Зеленский БМТни “нималарга қодирлигини унутиб қўйган пенсиядаги суперқаҳрамонга” қиёслади

“БМТ анчадан бери танқидлар, ҳеч нарсага қодир эмаслиги ҳақидаги айбловларни эшитиб келмоқда. Энг ёмони – БМТ миллатлар лигасига айлангани. Бугунги кунда БМТ нималарга қодирлигини унутиб қўйган пенсиядаги суперқаҳрамонга ўхшайди. У ўзини ортиқча юк, ҳаёти беҳуда кетган заиф, керакмас чол деб ҳисоблайди”, деб айтган Зеленский.

Украина раҳбари ташкилотдаги ислоҳотларни БМТ низомини янгилашдан бошлашга чақирган. “Биз БМТни жонлантиришни истаймиз. Бунинг учун дастлаб унинг низомини янгилаш лозим. Бу низом шунчаки хоҳласа қилиш, хоҳламаса қилмаслик мумкин бўлган тавсиялар эмас. Сиз унда “ҳар ким ўзи учун” деган сўзларни топмайсиз. Акс ҳолда дунё коронавирусга қарши имтиҳондан, бирдамликка имтиҳондан ўта олмаганини тан олишига тўғри келмаган бўларди”, деб ўз сўзларини давом эттирган Украина президенти.

Зеленскийнинг айтишича, халқаро ташкилот барча давлатларга вакциналарга тенг ҳуқуқли эга бўлиш имконини таъминлай олмай коронавирус пандемияси, террорчилик, ҳарбий тажовуз муаммоларини ҳал қила олмаяпти. Бундан ташқари, у БМТни “Қрим платформасида” иштирок этишдан бош тортаётгани учун танқид қилган.

Шу билан бирга, Украина раҳбари БМТ эвазига 1981 йилдан бери 1 млрддан кўпроқ одам “умрида биринчи марта ичимлик сувидан эркин фойдалана олгани”, 83та давлатда 90 млн киши егулик билан таъминлангани, унинг апартеидга қарши курашдаги, инсон ҳуқуқларини қўллаб-қувватлашдаги, инсонпарварлик фаолиятидаги ролини таъкидлаб ўтган.

Зеленский давлатлар етакчиларини глобал муаммоларни ҳал қилишда ҳамкорликни кучайтиришга чақирган.

“Келинг, ҳамкорликни кучайтириш учун барчамиз бир ёқадан бош чиқаришга тайёрлигимизни кўрсатайлик. Буни шунчаки ҳеч қандай резолюцияларсиз, декларацияларсиз, ўзаро келишувларсиз қилайлик. Одамлар, миллатлар, бирлашган миллатлар сифатида буни амалга оширайлик – ё бизнинг ҳаракатлар маънога тўла бўлади ёки бу курсилар бўш бўлади”, деб қўшимча қилган Зеленский.