Зеленский Эрдўғандан Россиядаги украиналик маҳбусларни озод қилиш ҳақида Путинга айтишни илтимос қилган 

Украина президенти Владимир Зеленский туркиялик ҳамкасби Ражаб Тоййиб Эрдўған билан учрашувда унга Россияда ушлаб турилган 450 нафар украиналик маҳбусдан иборат рўйхатни берган ва ундан Россия президенти Владимир Путинга улар озод этилиши кераклиги ҳақида айтишни илтимос қилган. Бу ҳақда Украина ташқи ишлар вазири Дмитрий Кулеба маълум қилди. 

Зеленский ва Эрдўғаннинг учрашуви Нью-Йоркда БМТ Бош ассамблеяси вақтида ўтган. “Улар юзма-юз анча гаплашишди, сўнгра делегациялар иштирокида яна бир учрашув бўлди. Биз ҳам икки томонлама, ҳам президент Эрдўған президент Путин билан учрашувда кўтармоқчи бўлаётган масалаларни муҳокама қилдик”, деб айтган Кулеба.

Унинг таъкидлашича, учрашувда Зеленский Эрдўғандан Россияда ушлаб турилган украиналик маҳбусларни озод қилиш кераклиги ҳақида Путинга айтишини илтимос қилган.

Эрдўған ва Путиннинг учрашуви 29 сентябрда Сочида бўлиб ўтди. У 3 соатча давом этган. Кремль учрашувда кўтарилган икки томонлама масалалар орасида газ муаммоси, С-400 тизимлари сотиб олиниши, “Аккую” АЭС қурилиши, ташқи масалалар орасида Сурия, Афғонистон, Ливиядаги вазият, Тоғли Қорабоғда тартиб ўрнатилиши кабилар бўлганини маълум қилган. Бироқ Путин ва Эрдўған Украинадаги вазиятни муҳокама қилгани ёки йўқлиги маълум қилинмаган.