Шавкат Мирзиёев хориждагиларнинг даромадини солиққа тортиш бўйича ўз фикрини билдирди

Шавкат Мирзиёев Тошкент вилояти сайловчилари билан учрашувда хориждагиларнинг даромадини солиққа тортиш бўйича ўз фикрини билдирди. Бу ҳақда Kun.uz мухбири хабар бермоқда.

Фото: Миллий масс-медиа фонди

“Мен биринчи кундан бошлаб айтганман, четда юрганлар бизнинг айбимиз билан юрибди. Тўқсонинчи йилларда хорижга кетиш йўқ эдику. Четда юрганларнинг даромадини солиққа тортиш бўйича ташаббуслар бўлди. Мен бир гапни айтаман – бу мутлақо нотўғри гап. Хориждаги юртдошларимиз ҳалол меҳнатлари билан топган пулларини солиққа тортсак бу адолатдан бўлмайди, сиёсатимизга тўғри келмайди.

Мусофир бўлмаган мусулмон бўлмайди, дейишади. Мен фидойи фарзандларимизга мурожаат қилмоқчиман – кўнгилларинг тўқ бўлсин! Биз янги солиқ яратиш эмас, имкон қадар солиқларни камайтириш тўғрисида ўйлаймиз.

Мен кеча МДҲ давлатлари йиғилишида ҳам мигрантлар масаласини кўтардим, уларнинг хавфсизлиги, соғлиги бўйича таклифларимни айтдим. Энди улар биздан ишчилар жўнатишимизни сўрашяпти. Мен улардан юртдошларимизни ўқитишларини ва муносиб иш беришларини сўраяпман”, – дея номзоднинг сўзларидан иқтибос келтирмоқда Kun.uz мухбири.

Куни кеча “Миллий тикланиш” партиясидан президентликка номзод Алишер Қодиров хориждаги ўзбекистонлик меҳнат муҳожирлари оилаларига юбораётган пулларни солиққа тортишни таклиф қилган эди. Унинг бу таклифи ижтимоий тармоқларда қизғин танқидларни келтириб чиқарди.