Жанубий Кореяда ишчилар “Кальмар ўйини” сериали қаҳрамонлари либосида намойишга чиқди

Жанубий кореялик ишчилар “Кальмар ўйини” сериали қаҳрамонлари либосида митингга чиқди, деб хабар берди Reuters.

Хабарда айтилишича, Корея касаба уюшмалари конфедерациясининг (KCTU) минглаб аъзолари Жанубий Кореянинг бир нечта шаҳрида умуммиллий намойишлар ташкил этди. Мамлакат бўйича минглаб кишилар ҳукуматдан меҳнат шароитларини яхшилаш ва энг кам иш ҳақи миқдорини оширишни сўраб кўчаларга чиқди.

Сеулдаги намойишларда ўнлаб ишчилар “Кальмар ўйини” сериали қаҳрамонлари либосида қатнашди.

Ишчиларнинг сўзларига кўра, улар ҳам сериал қаҳрамонлари каби тирикчилик қилиш учун бор кучлари билан ҳаракат қилмоқда.

Жанубий Кореянинг “Кальмар ўйини” сериали омон қолиш ҳақида бўлиб, воқеалар замонавий Сеулда юз беради. 456 кишидан иборат гуруҳга йирик миқдордаги маблағни ютиб олиш имкониятини берувчи болалар ўйинларини ўйнаш таклиф этилади, аммо ўйинда ютқазганлар ҳаёт билан видолашишига тўғри келади.