АҚШ Туркияга янги элчи тайинлади

Америкалик сенаторлар Жефф Флейк номзодини АҚШнинг Туркиядаги элчиси этиб тасдиқлади. 

“Сенат Жеффри Лейн Флейкни АҚШнинг Туркия Республикасидаги фавқулодда ва мухтор элчиси лавозимига тасдиқлади”, – дейилади конгресс палатаси хабарида.

Номзодни тасдиқлаш Туркия президенти Ражаб Тоййиб Эрдўғаннинг ўн нафар элчи, жумладан, АҚШ элчисини мамлакатдан чиқариб юбориш тўғрисидаги баёноти билан боғлиқ можаро якун топганидан сўнг амалга оширилди.

18 октябрь куни АҚШ, Германия, Франция, Канада, Нидерландия, Дания, Швеция, Норвегия, Финландия ва Янги Зеландия элчилари қўшма баёнот эълон қилган, унда Туркия ҳукуматидан ҳуқуқ фаоли Усмон Кавала бўйича масалага тезкорлик билан адолатли ечим топиш сўралган эди. Элчилар фаолнинг ҳибсда сақланиши Туркия учун “кўланка” эканлигини қайд этган. Баёнот эълон қилинган куннинг эртасига бу 10 та мамлакат элчилари Туркия Ташқи ишлар вазирлигига чақирилган.

21 октябрда Туркия президенти АҚШ, Германия, Дания, Финландия, Франция, Нидерландия, Швеция, Канада, Норвегия ва Янги Зеландия элчиларини мамлакат суди ишларига аралашишгани учун танқид қилган. Кейинроқ эса уларни мамлакатдан чиқариб юборишга қарор қилди.

Душанба куни АҚШ ва бошқа мамлакатлар элчихоналари элчиларнинг бошқа мамлакатларнинг ички ишларига аралашмаслиги тўғрисида баёнот берди.