Болгариядаги шаҳарда аҳоли кетиб қолишини тўхтатиш учун бепул ер берилади

Болгариянинг Свиленград шаҳрида аҳоли кетиб қолишини тўхтатиш мақсадида уй қуриш учун бўш участкалар бепул берилади. Бу ҳақда TheMayor.EU портали хабар қилди.

Ҳозирда Болгария аҳолиси сони бошқа мамлакатларникига нисбатан тез камаймоқда. Свиленград шаҳрида XXI аср бошида 19 мингдан ортиқ киши яшаган бўлса, ҳозирда 16 минг атрофида аҳоли истиқомат қилади.

Шу боис янги дастур ёш оилалар ва бошловчи мутахассислар учун мўлжалланган. Маҳаллий ҳокимият шу йўл билан аҳоли кетиб қолиши муаммосини ҳал қилмоқчи, деб ёзади портал.

Қайд этилишича, ноқулай шароитда яшаётганлар ва шахсий уй-жойга эга бўлмаганлар бепул ер олиши мумкин.

Қурилиш учун майдондан ташқари, барча зарур рухсатномалар ва тасдиқланган архитектура режасидан иборат ҳужжатлар ҳам тақдим этилади.

Дастурнинг биринчи босқичида саккизта участкани бериш режалаштирилган. Агар ташаббус муваффақиятли амалга ошса, келгусида дастур янада кенгайтирилади.