Нью-Йоркнинг янги мэри дастлабки уч ойлик маошини криптовалютада олади

Нью-Йоркнинг янги сайланган мэри  Эрик Адамс дастлабки уч ойлик маошини биткоинда олишни режалаштирмоқда, келажакда эса шаҳарни криптовалюталар марказига айлантирмоқчи.

“Нью-Йоркда доимо олдинга интиламиз, шунинг учун дастлабки уч ойлик маошимни биткоинда олишни режалаштиряпман,. Нью-Йорк криптовалюталар ва бошқа инновацион саноат марказига айланади. Кутинг!”, – деб ёзди Адамс Twitter саҳифасида.

Унинг бу пости биринчи ойлик маошини биткоинда олишни истаётганини ёзган Майами мэри Фрэнсис Суаресга жавоб тариқасида ёзилди.

Аввалроқ Эрик Адамс Bloomberg агентлигига берган интервьюсида Нью-Йоркда “биткоин ривожланишига тўсиқ” кўраётганини ва MiamiCoin каби шаҳарнинг ўз рақамли валютасини яратиш истиқболини кўриб чиқаётганини айтганди.

Эслатиб ўтамиз, собиқ полициячи Эрик Адамс 2 ноябрь куни Нью-Йорк мэрлигига ўтказилган сайловда ғалаба қозонди.