Pfizer’нинг коронавирусга қарши янги таблеткаси 89 фоизлик самарадорлик кўрсатаётгани айтилди

Pfizer компанияси расмий пресс-релизида айтилишича, ўтказилган оралиқ таҳлиллар таблетка ташхис қўйилганидан сўнг уч кун ичида истеъмол қилинса, беморнинг шифохонага ётиш эҳтимоли ва COVID-19 юқиши туфайли турли сабабларга кўра ўлиш хавфини 89 фоизга камайтирар экан.

Тадқиқотда 1200дан зиёд нафар балоғат ёшидаги, енгил ва ўрта даражада коронавирус юқтирган беморлар иштирок этишган. 607 кишидан иборат ва препаратни қабул қилган гуруҳда фақат 6 киши шифохонага ётқизилган, ҳеч ким вафот этмаган. Плацебо берилган 612 нафар беморлар ичидан 41 нафарининг аҳволи оғирлашиб, алалоқибатда уларнинг 10 нафари вафот этган.

Компания PAXLOVID деб номланган дорини АҚШда расмий рўйхатдан ўтказиш учун ҳужжат тайёрламоқда.

«Бугунги янгиликлар ушбу пандемиянинг вайронкор оқибатларини бартараф этиш бўйича глобал саъй-ҳаракатларда ўйин қоидаларини тубдан ўзгартиради. Вирусга қарши орал қабул қилинадиган препаратимиз агар маъқулланадиган бўлса, олинган натижалар беморларнинг ҳаётини асраб қолиш, COVID-19 инфекциясининг оғир ўтишини пасайтириш ва шифохонага ётиши мумкин бўлган ўн инсондан тўққиз нафарини қутқариб қолиш мумкинлигини кўрсатмоқда», — деди компаниянинг ижрочи директори Алберт Бурла.