Амударёда бир тун: Пичоғи бор қиморбозлар, маст ҳолда аҳоли тинчлигини бузганлар, кўнгилочар масканга кирган вояга етмаганлар ва маст ҳайдовчилар

Ўзбекистон ИИВ, Қорақалпоғистон ИИВнинг кўрсатмаларига асосан 2 ноябр куни Амударё туманида “Хавфсиз тун” рейд тадбири ўтказилди. Тегишли ташкилотлардан жами 99 нафар ходим туманда 6 та маъмурий ҳудудга бўлинган ҳолда 5 та йўналишда иш олиб борган. Бу ҳақда Амударё тумани ИИБ ҲПБ бошлиғи Орифжон Қосимов хабар берди.

Маълум бўлишича, Манғит шаҳрида ўтказилган рейд тадбирлари давомида Тадбиркорлар кўчаси 106-уйда бир гуруҳ шахслар қимор ўйини ўйнаб ўтирган ҳолат аниқланган. Улардан 968 минг сўм пуллар далилий ашё сифатида олинган. Қимор ўйини иштирокчиси Ч.Қ.нинг чўнтагида ўткир тиғли ошхона пичоғи ҳам борлиги маълум бўлган.

Бундан ташқари, тунги соат 23:00лардан сўнг Манғит шаҳри ҳудудидаги кўнгилочар масканлар назорат қилинганида 3 нафар вояга етмаган болалар билярд ўйнаётгани аниқланган. Шу вақтнинг ўзида маскан эгасига вояга етмаганларнинг тунги вақтда ўйнашларига йўл қўйгани учун Маъмурий жавобгарлик тўғрисидаги Кодекснинг тегишли моддаларига асосан баённома расмийлаштирилган.

Шунингдек, шаҳар кўчаларида спиртли ичимлик ичиб, маст ҳолда шовқин кўтариб, аҳоли тинчлигини бузиб юрган 2 нафар фуқаро аниқланган. Улар ходимларнинг қонуний талабларини бажармаганлари учун туман ИИБ биносига олиб келиниб, ҳужжатлар расмийлаштирилган.

Рейд тадбирида 11 нафар ЙПХ ходимлари йўлларда автотранспортда ҳаракатланишда 98 та қоидабузарликларни аниқлашган. Шунинг 3 таси маст ҳолда транспорт воситасини бошқариш, 27 таси тегишли ҳужжатларга эга бўлмай транспорт бошқариш, 68 таси турли йўл ҳаракати қоидаларига амал қилмай транспорт бошқариш ҳолатларидир.