Алифбо ислоҳоти бўйича Республика ишчи гуруҳининг кенгайтирилган йиғилиши келгуси ҳафтада ўтказилиши кутилмоқда

1 ноябрь куни лотин ёзувига асосланган ўзбек алифбосига ўзгартишлар киритиш ҳақидаги қонун лойиҳаси муҳокамасининг узайтирилган муддати якунига етди.

Хўш, ўтган олти ой давомида алифбо борасида қандай хулосага келинди? У қачон жамоатчиликка эълон қилинади? Олимлар хулосасидан кейинги жараёнлар-чи, у қандай кечади?

Kun.uz мухбири шу каби саволлар юзасидан Давлат тилини ривожлантириш департаменти мудири Абдуғаффор Қирғизбоев билан боғланди.

Департамент мудирига кўра, лотин ёзувига асосланган ўзбек алифбосига ўзгартиришлар киритиш бўйича муҳокамалар якунига етган ва кейинги ҳафта Ўзбекистон олимларининг бу борада кенгайтирилган йиғилиши бўлиб ўтиши кутилмоқда.

«Олимларда ҳамон ҳар хил фикр бор. Бири ундай деса, бири бундай дейди. Тегма, деётганлар ҳам бор. Лекин шуниси аниқки, алифбони қулай кўринишга келтириш учун 3-4 та ҳарф ўзгариши керак. Бу жуда катта муаммо бўлмайди.

Биз ҳар бир олимнинг фикрини оламиз. Эндиликда бутун республика бўйича олимларнинг сўнгги йиғилишини ўтказиб, якуний қарорга келиш қоляпти. Биз ҳозир йиғинга келадиган олимлар рўйхатини шакллантиряпмиз.

Якуний қарор бўйича эса қонун лойиҳаси тайёрланади ва у парламент муҳокамасига киритилади», – деди Абдуғаффор Қирғизбоев.

Маълумот учун, 2021 йилнинг 3 март куни «Лотин ёзувига асосланган ўзбек алифбосини жорий этиш тўғрисида»ги қонунга ўзгартиришлар киритиш ҳақида»ги қонун лойиҳаси эълон қилинди.

Лойиҳа муҳокамаси бўйича белгиланган дастлабки муддат давомида (16 мартдан 31 мартга қадар) лойиҳани 26 мингдан зиёд киши кўриб, 1035 та фикр қолдирган. Таклифларнинг 56 фоизи (547 таси) лотин ёзувига асосланган ўзбек алифбосининг ислоҳ қилинишини, 32 фоизи (302 таси) эса амалдаги алифбода қолишни ёқлаган.

Кейинчалик, Давлат тилини ривожлантириш департаменти қонун лойиҳаси муҳокамаси муддатини яна олти ойга узайтирди.

Бу эса «Республика ишчи гуруҳининг лотин ёзувига асосланган ўзбек алифбосини ҳар томонлама пухта, кенг жамоатчилик фикр-мулоҳазалари ва таклифларини чуқур ўрганган ҳолда такомиллаштириш мақсадида», дея изоҳланди.