Airbus 255 та A321 самолётидан етказиб беришга шартнома имзолади

Airbus концерни Дубай авиасалонида Indigo Partners инвестицион жамғармаси эгалик қилувчи бир қатор авиакомпаниялар билан шартнома имзолаганини эълон қилди. Шартнома доирасида авиаконцерн 4 та авиакомпания — Wizz Air, Frontier, Volaris ва JetSMART’га тор фюзеляжли A321 самолётидан 255 та етказиб беради.

Компанияларга самолётнинг A321neo ва A321XLR моделлари етказилади. Жумладан, Венгриянинг Wizz Air компанияси 102 та, АҚШнинг Frontier компанияси 91 та, Мексиканинг Volaris компанияси 39 та ва Чилининг JetSMART компанияси 23 та самолёт олади.

Бундан ташқари, шартнома доирасида Volaris ва JetSMART аввал буюртирган 38 та A320neo самолёти ўрнига A321’дан олишга қарор қилган.

Битим қиймати маълум қилинмаган. Бироқ Airbus’нинг 2018 йилда чоп этилган охирги каталогига кўра, 255 та самолёт 4 та авиакомпанияга тахминан 33 млрд долларга тушади. Бироқ йирик буюртмаларда самолётларга деярли ҳар доим чегирма берилади ва шу сабабли шартнома қиймати ушбу суммадан камроқни ташкил қилиши ҳам мумкин.