NASA Ойда АЭС қуриш бўйича лойиҳалар қабул қилинишини эълон қилди

NASA ва Айдаҳо миллий лабораторияси Ойда атом электр станцияси қурилиши бўйича ғояларни йиғишини эълон қилди. Бу ҳақда Associated Press хабар бермоқда.

Хабарга кўра, лойиҳалар NASA’га 2022 йил 19 февралгача юборилиши лозим.

«Ой юзасида ишончли ва кучли энергия тизимини яратиш коинотнинг инсон томонидан ўзлаштирилишида муҳим қадам бўлади ва буни амалга ошира оламиз», — дейилади Айдаҳо миллий лабораторияси лойиҳа раҳбари Себастян Корбизьеронинг баёнотида.

Қайд этилишича, ядровий реактор Ойдаги муҳит шароитидан қатъи назар ишончли ва кучли энергия тизими билан таъминлаш имконини беради.

Реактор Ерда қурилади ва Ойга жўнатилади.

Режага кўра, реактор инсон иштирокисиз ёниб-ўчиши, қўниш модули бортида ишлай олиши ва ташиш учун қулай бўлиши лозим.