Австралияда рекорд сонда оёқчаларга эга мингоёқ топилди

Австралияда рекорд сонда оёқчаларга эга бўлган мингоёқ топилди. Рекордчи мингоёқ 1306та оёққа эгалиги ҳисоблаб чиқилган. Бунгача табиатда 750тадан кўпроқ оёққа эга бўлган жонзот топилмаганди. Бу ҳақда Scientific Reports нашрида чоп этилган мақолага таяниб CNN телеканали хабар берди.

Eumillipes рersephone деб аталган мингоёқ 2020 йил ёзида бурғилаш қудуғида 60 метр чуқурликда аниқланган.

Кўзи бўлмаган умуртқасиз ҳашаротнинг узунлиги 9,5 сантиметрни, эни бор-йўғи 1 миллиметрни ташкил қилади. У 330 та тана сегменти, мўйловчалар ва конуссимон бошга эга.  

“Бу кўйлакдан гўёки 1306 та оёғи бўлган оқ ипни тортиб олишдек гап”, деб айтган тадқиқот муаллифи, Виржиния технологик институти энтомология кафедраси мутахассиси Пол Марек.

У ҳашаротнинг бирорта оёғи қолиб кетмагани ёки икки марталаб санаб юборилмаганига ишонч ҳосил қилиш учун Adobe Illustrator дастурида ҳашаротнинг юқори аниқликдаги суратидан фойдаланиб, 10 та оёқчадан иборат ҳар бир сегментини ранг билан белгилаб чиққан.

“Мен унинг оёқчаларини 3 марта санаб чиқдим ва бунга бир соат вақт кетди”, деб айтган мутахассис.

Таксономик таҳлил Eumillipes рersephone аввалги рекордчи - Illacme plenipes мингоёғининг “узоқ қариндоши” эканини кўрсатган.  

Тахмин қилинишича, ушбу икки ҳашарот тупроқдаги тор тешиклардан ўтиш учун бундай кўп сонда тана сегментлари ва оёқчаларга эга.