Дубай амирининг собиқ рафиқаси ажрашгандан кейин 554 миллион фунт стерлинг олади

Дубай амири Муҳаммад бин Рошид Ол Мактумнинг собиқ рафиқаси - малика Ҳайя амир билан ажрашгандан кейин ундан 554 млн фунт стерлинг оладиган бўлди. Бу ҳақда Daily Mail нашри хабар берди.

Фото: Getty Images

Бундай қарорни Дубай амири ва маликанинг ажрашиш ишини кўриб чиққан Британия олий суди қабул қилган.

Суд қарорига кўра, малика оладиган пулларнинг 251 млн фунт стерлинги собиқ турмуш ўртоғи томонидан музд сифатида тўланади. Қолган 290 млн фунт стерлинг эса амир ва маликанинг фарзандлари – 14 ёшли Жалила ва 9 ёшли Зайдни таъминлашга йўналтирилади. Бундан ташқари, амир фарзандларининг ўқиши ва жорий харажатлари учун мос равишда 3 млн ва 9,6 млн фунт стерлингдан тўлайди.

Бундан ташқари, суд Ол Мактум ўз рафиқаси ва фарзандларига “энг катта хавф” экани ҳақидаги қарорга келган.

Таъкидлаш жоиз, суд томонидан малика Ҳайя фойдасига ундириладиган сумма малика ва унинг адвокатлари сўраган пулдан 900 млн фунт стерлинг камроқни ташкил қилади. Малика ҳимояси бу пуллар хавфсизлик хизматига ҳақ тўлаш учун зарурлигини айтган, чунки улар Дубай амири фарзандларини ўғирлаши мумкинлигидан хавотирланишмоқда.

Ол Мактум 6-рафиқаси - малика Ҳайя бинт ал-Ҳусайннинг ўз фарзандлари билан қочиб кетгани ҳақида 2019 йил июнда маълум қилган. Кейинроқ малика Лондонда экани аниқланган. ОАВда маликанинг қочиб кетишига эри уни тансоқчиси билан хиёнат устида ушлаб олгани сабаб бўлиши мумкинлиги айтилган.