Жанубий Кореянинг 22 йиллик қамоқ жазоси олган собиқ президенти афв этилади

69 ёшли собиқ сиёсатчи Янги йил муносабати билан афв этилиши режалаштирилаётган 3 мингдан кўпроқ маҳкумлар рўйхатига киритилган. Собиқ президентни афв этиш қарори унинг соғлиғи яхши эмаслигини ҳисобга олган ҳолда инсонпарварлик нуқтайи назаридан қабул қилинган. 2019 йилда Пак Кин Хенинг елкасида жарроҳлик амалиёти ўтказилган, жорий йилда эса у елка ва умуртқадаги оғриқлар билан 3 марта шифохонага ётқизилган. У 4 йил 9 ойни панжара ортида ўтказган.

Бундан ташқари, 2006-2007 йилларда мамлакат бош вазири лавозимини эгаллаган Хан Мён Сук ҳам озодликка чиқарилади. У сиёсий мақсадлар учун пул маблағларини ноқонуний олишда айбланган.

Шу билан бирга, Жанубий Кореянинг бошқа собиқ президенти, порахўрлик ва давлат маблағларини сарфлаб юборганлик учун 17 йиллик қамоқ жазосини ўтаётган Ли Мен Бак афв этиладиганлар орасига киритилмаган.

Жанубий Корея президенти лавозимини 2013 йил февралда эгаллаган Пак Кин Хэ ҳокимиятни суиистеъмол қилиш ва порахўрликдаги айбловлар учун 2017 йил мартида ўз лавозимидан четлатилганди. Унга нисбатан чиқарилган ҳукмга кўра, сиёсатчи Жанубий Кореянинг Samsung ва Lotte каби йирик компанияларини ўз дугонасига қарашли жамғармаларга 77,4 млрд вон хайрия қилишга мажбурлаган. Собиқ президент ва унинг ёрдамчилари, шунингдек, миллий разведка хизматининг 3 нафар собиқ раҳбаридан 3,5 млрд вон пора олганликда айбланган.

Пак Кин Хэ дастлаб 30 йиллик қамоқ жазоси ва 17 млрд долларга яқин жаримага тортилган. Бироқ кейинроқ суд ҳукмни юмшатиб, қамоқ жазосини 20 йилгача қисқартирган ва сиёсатчининг 180 млрд вон жарима ҳамда 35 млрд вон товон пули тўлаши кераклигини белгилаган.