«Буни шу ерда ўзимиз ҳал қилиб оламиз». Порошенко Путиннинг сиёсий бошпана бериш таклифига жавоб қайтарди

«Бизнинг жамоа бир неча бор Украинада европапараст мухолифат таъқиб қилинаётгани ҳақида, [президент] Зеленский, Путинга совға тайёрлашни хоҳлаётгани ҳақида маълум қилган. Ҳозир буни Путиннинг ўзи ҳам тасдиқлаган», - дейди Порошенко.

У Зеленскийга Путинни хурсанд қилишни бас қилиш ва мамлакат ҳимоясига киришишни, барча саъй-ҳаракатларини айнан шу ерга йўналтиришни маслаҳат берган.

У Путинга мурожаат қилар экан, «украинларнинг ўзи, шу ерда, Украинада ҳал қилиши»ни тушунишни маслаҳат берди.

«Владимир Владимировичга (Путинга) бу масалани ўзимиз, Украинада ҳал қилишимизни тушунишни маслаҳат бераман. Россиянинг Украина сиёсатига қайғуриш амалиётига аллақачон чек қўйилган. Бу мен Украина президенти этиб сайланган пайтимда [2014 йилда] тўхтаган», деган Порошенко.

Путин нима деганди?
Душанба куни кечқурун Владимир Путин Москвада Франция президенти Эммануэл Макрон билан учрашув ўтказди. Беш соатдан ортиқ вақт давом этган музокаралардан кейин улар қўшма матбуот анжуманида иштирок этди ва Путин матбуот анжумани давомида Порошенкога Россиядан сиёсий бошпана таклиф этиш ҳақида гапирди.

«Ўз вақтида, жаноб Порошенко ҳали Украина президенти эканида мен унга, агар унда келажаги бўйича қандайдир муаммо юзага келса, Россия унга сиёсий бошпана тақдим этишга тайёр эканини айтгандим. Ўшанда у бу масала бўйича менга киноя қилганди. Донбассдаги масалага ечим топиш бўйича ўзаро келишмовчилигимиз борлигига қарамай, бугун мен ўз таклифимни яна бир бор такрорлашни истардим», дея Путиннинг сўзларини келтирган «Интерфакс».

«Мен у бу йўналишда кўплаб хатоларга йўл қўйган, деб ҳисоблайман. Аммо барибир унинг давлат жиноятчиси сифатида таъқиб этилиши, менимча, амалдаги раҳбариятнинг ўзини кўрсатиш учун ҳаддан ташқари уринишидир. Биз жаноб  Порошенко кабиларга Россиядан бошпана беришга тайёрмиз», - дея давом этган Россия президенти.

Порошенкога қарши жиноий иш
Украина ҳукумати Петро Порошенкони терроризмни молиялаштириш ва давлатга хиёнатда, шунингдек террорчилик ташкилоти тузишда айбламоқда ва унга 15 йилгача озодликдан маҳрум этиш жазоси таҳдид қилмоқда.

Терговчиларнинг ҳисоблашича, 2014 йилда у руспараст сиёсатчилар, Путиннинг чўқинтирган отаси Виктор Медведчук ва бошқа шахслар билан келишган ҳолда Украинага Жанубий Африкадан кўмир олиб келиш бўйича шартномани бекор қилиб, ёнилғини Донбассдаги тан олинмаган республикалардан сотиб олишни ташкиллаштирган.

Киевнинг Печерский суди сиёсатчига нисбатан шахсий мажбурият кўринишидаги эҳтиёт чорасини танлади, шунингдек, ундан чет элга чиқиш паспортларини топширишни буюрди. Собиқ президент эса ўз айбини рад этиб, унга қарши жиноий ишни сиёсий мотивларга эга деб атамоқда.

2014 йилда Евромайдан ғолиб келишгач, Россия Украинанинг собиқ президенти Виктор Януковичга сиёсий бошпана берганди. Украинада Януковичга нисбатан ҳам бир неча жиноий ишлар очилган, жумладан у давлатга хиёнатда айбланган. 2020 йилда Янукович давлатга хиёнат қилишда ва «Украинага қарши тажовузкор уруш олиб боришда ҳамкорлик»да айбдор деб топилган, уни сиртдан 13 йиллик қамоқ жазосига ҳукм этишган.