Украинада жанговар ҳаракатлар бошланса нефть нархи 150 долларга чиқиши айтилди

Американинг JPMorgan банки таҳлилчилари Украина билан муносабатлар кескинлашиши оқибатида Россиядан хом нефть экспорт қилиш қисқарадиган бўлса, бир баррел Brent русумидаги нефть нархи 120 долларгача чиқиши мумкинлигини прогноз қилди.

Россия нефти экспорти ҳажми икки бараварга қисқарадиган бўлса, Brent нархи 150 долларга етиши мумкин, деб ёзади CNN банк шарҳига асосланиб.

Мутахассисларнинг таъкидлашича, Украина ҳудудида қуролли низо келиб чиққан тақдирда бунинг оқибатларини бутун дунёдаги истеъмолчилар ҳис қилади.

CNN телеканалининг қайд этишича, нефть нархининг кўтарилиши бензин нархи кескин ўсишига олиб келади.

Россия ва Украина муносабатларидаги сиёсий кескинлик охирги ҳафталарда нефть нархи кўтарилишига сабаб бўлди. 7 феврал куни Brent русумидаги нефтнинг бир баррели нархи етти йиллик максимумни янгилаб, 93,04 долларга тенг бўлди. Тарихий максимум 2008 йил июлда қайд этилган, ўшанда Brent нархи 147,50 долларга етган.

Ҳозирда Россия нефть ва табиий газ қазиб олиш бўйича дунёда АҚШдан кейин иккинчи ўринда туради.