ДХР ва ЛХР раҳбарлари Путиндан ўзини мустақил деб эълон қилган республикаларни тан олишни сўради

Донбассда ўзини ўзи мустақил деб эълон қилган Донецк халқ республикаси ва Луганск халқ республикаси раҳбарлари Денис Пушилин ҳамда Леонид Пасечник Россия президенти Владимир Путиндан бу республикаларни тан олишни сўради.

Пушилин ва Пасечникнинг мурожаати «Россия 24» канали орқали эфирга берилди. Улар ўз сўровига сабаб сифатида «тинч аҳоли орасида қурбонлар бўлишининг олдини олиш зарурати»ни келтирган.

ДХР ва ЛХР раҳбарлари Путиндан республикалар билан дўстлик ва ҳамкорлик тўғрисида келишувлар ҳам имзолашни сўраган.

• РФ Давлат думаси 15 февраль куни Путинга ДХР ва ЛХРни тан олишни сўраб, расман мурожаат қилганди. Президент матбуот котиби Дмитрий Песков кейинроқ президент депутатларнинг мурожаати ҳақида хабардор экани, «мурожаат маълумот учун қабул қилингани»ни айтганди. Шу билан бирга Песков бу республикаларни тан олиш Минск келишувларини бузиш ҳисобланиши, бу келишувларнинг амалга ошиши айни вақтда Путин учун устувор вазифа эканини айтганди.