«Путин уни нима кутаётганини билмайди». Жо Байден янги жавоб чораларини ваъда қилди

Байден ўз нутқида америкаликларни эркинлик доим зулм устидан тантана қилиши борасидаги қатъиятига ишонтирди.

Келгуси иқтисодий жавоб чоралари ҳақида гапираркан, АҚШ президенти Путин ҳақида шундай деди: «У ўзини нима кутаётганини тасаввур қила олмайди».

«Олти кун олдин Путин эркин дунё пойдеворини силкитмоқчи бўлди, уни ўз таҳдидим қаршисида бош эгдираман деб ўйлади. Аммо у қаттиқ адашди.

У ўйладики, Украинага киришим билан дунё остин-устун бўлиб кетади деб. Бунинг ўрнига уни ўзи ўйламаган ва тасаввур ҳам қилмаган мустаҳкам девор қарши олди, бу - украин халқи», - деди Байден.

«Путиннинг уруши қасддан ва сабабсиз эди. У бир неча бор дипломатик саъй-ҳаракатларни инкор этди... У Ғарб ва НАТО жавоб қайтармайди деб ўйлади. У ўйладики, бизни бўлиб юбориш мумкин... Путин хато қилди. Биз тайёр эдик», - деган Жо Байден.

Шу билан бирга америкаликлар етакчиси АҚШ «НАТОнинг ҳар бир дюйм ҳудудини ҳимоя қилиши», аммо Украинада уруш қилмоқчи эмаслигини таъкидлаган.

«Очиғини айтишга рухсат беринг: бизнинг кучларимиз Украинада россиялик ҳарбийлар билан можарога аралашмайди. Бизнинг ҳарбийларимиз Украинага жанг қилиш учун юборилмайди, аммо улар НАТО бўйича иттифоқчиларимизни ҳимоя қилишади», деган Байден.

Унинг сўзларига кўра, АҚШ иттифоқчилари, жумладан Польша, Руминия, Латвия, Литва ва Эстонияни ҳимоялаш учун қуруқлик, денгиз ва ҳаво кучларини сафарбар қилмоқда.

Жо Байден АҚШ ва ҳамкорлар Россиянинг Украинага эҳтимолий босқинига синчковлик билан тайёрланган.

«Мен европалик иттифоқчиларимизни бирлаштириш учун беҳисоб вақтимни сарфладим. Иттифоқчиларимиз билан биз ҳозирда кучли иқтисодий санкциялар киритмоқдамиз. Иттифоқчиларимиз билан биргаликда украинларни уларнинг эркинлик учун курашида қўллаб-қувватламоқдамиз. Ҳарбий ёрдам. Иқтисодий ёрдам. Инсонпарварлик ёрдами. Биз Украинага 1 млрд доллардан ортиқ миқдорда тўғридан тўғри ёрдам жўнатдик», деган у.

Байден Украина билан боғлиқ вазиятда давлатлар раҳбарларининг бирдамлиги кузатилаётганини қайд этган. «Биз янада бирдам Европани, янада бирдам Ғарбни кўрмоқдамиз», деган АҚШ президенти.

Яна бир жавоб чораси сифатида Байден АҚШ ҳам Европа ва Канада ортидан ўз ҳаво кенгликларини Россия самолётлари учун ёпишини маълум қилди.

Америка транспорт вазирлиги бу тақиқ Россия томонидан фойдаланиладиган, шу мамлакатда рўйхатдан ўтган ва сертификат берилган барча самолётларга, жумладан чартер рейсларга ҳам тааллуқли бўлади.

Бу вақтда Конгрессдаги икки партия вакиллари ҳам Оқ уй Россияга қарши санкцияларни қатъийлаштиришига, жумладан Россия нефти импортига тақиқ қўйишига эришишга ҳаракат қилмоқда.

Етакчи республикачилар Байденнинг чиқишини танқид ҳам қилишди, улар Украинадаги можаро авж олган вақтда Россия нефть экспорт қилишда давом этаётганига эътибор қаратишган. Айрим демократлар ҳам бу борада гапиришмоқда, шу билан бирга АҚШда нефть қазиб олиш ҳажмини оширишга қарши чиқишмоқда.

Миллатга мурожаатидан бир неча соат олдинроқ Байден Украина президенти Зеленский билан олти кундан буён Россия ҳужумини қайтараётган украинларга АҚШ қандай ёрдам кўрсатиши мумкинлиги борасида гаплашганди.