Қашқадарёда ов қилиш тақиқланган пневматик милтиқ билан ов қилиб юрган шахс ушланди

Унда ов қилиш учун тегишли ҳужжатлар ҳам бўлмаган.

Фото: Экология ва атроф-муҳитни муҳофаза қилиш қўмитаси

Қашқадарё вилояти Экология ва атроф-муҳитни муҳофаза қилиш бошқармасининг хабар беришича, Китоб туман экология бўлими инспекторлари томонидан ҳудудда ов қилиш қоидаларини тушунтириш мақсадида экологик назорат рейд тадбири ўтказилган.

Рейд давомида “Паландара” МФЙ ҳудудида яшовчи фуқаро Т. З. ов қилиш учун тақиқланган, ҳаваскорлик спорт қуроли бўлган пневматик милтиқ билан ҳудуддаги Қорахон тоғидан ов қилиб қайтаётганда тўхтатилиб, машинаси кўздан кечирилганда унинг салон қисмидан 1 дона пневматик милтиқ, 1 дона аудиоплейр, юкхонасида 1 дона каклик борлиги маълум бўлган.

Инспекторлар томонидан ушбу фуқаронинг ов қилиш ҳуқуқини берувчи ҳужжатлари текширилганда ҳеч қандай ҳужжатлар йўқлиги аниқланган. Пневматик милтиқ туман ИИБга ҳужжатлар тўпланиб, суд қарори чиққунига қадар ушлаб туриш учун топширилган.