Ҳомиладор аёлини Катта Фарғона каналига итариб юборган эркак 9 йилга озодликдан маҳрум этилди

Фарғонада ҳомиладор аёлини Фарғона каналига итариб юборган эркакка нисбатан жиноят ишлари бўйича Қўқон шаҳар суди томонидан жазо тайинланди.

Бу ҳақда Фарғона вилоят судларининг Телеграм каналида маълум қилинди.

Қайд этилишича, оиладаги келишмовчилик сабаб аёл жанжаллашиб онасининг уйига кетган. Аёлининг ортидан борган эркак ижара уйига олиб кетишини айтиб, турмуш ўртоғини канал бўйига бошлаб борган. Кутилмаганда рафиқасини сувга итариб юбориб, кўздан ғойиб бўлган. Чўкаётган аёлни кўриб қолган фуқаролардан бири уни қутқариб қолган.

Қидирув ҳаракатларидан сўнг қўлга олинган аёлнинг турмуш ўртоғи Н.Ж. устидан суд Жиноят ишлари бўйича Қўқон шаҳар судида кўриб чиқилган. Н.Ж. Ўзбекистон Республикаси Жиноят кодексининг тегишли моддаси билан айбдор деб топилиб, унга 9 йил озодликдан маҳрум қилиш жазоси тайинланган.

Аввалроқ Фарғона вилояти Риштон туманида оилавий келишмовчилик сабаб икки қизи билан уйдан чиқиб кетган она қидирилаётгани, кичик қизининг жонсиз танаси Катта Фарғона каналидан топилгани ҳақида хабар қилинган эди.