Олмалиқда “перчатка”да яширилган 117,5 млн сўмлик қимматбаҳо металлар фош этилди

"Олмалиқ КМК" АЖнинг бир гуруҳ ишчилари 117,5 млн сўмлик 160.5 гр қимматбаҳо металларни корхонадан олиб чиқишга уринган.

Қайд этилишича, ДХХнинг Тошкент вилояти бошқармаси ходимлари ва бошқа ҳуқуқни муҳофаза қилувчи органлар ҳамкорлигида тезкор тадбир ўтказилган. Унда қимматбаҳо металл ўғрилари қўлга олинган.

Тезкор тадбирда, олмалиқлик Х.Ф. "Олмалиқ КМК" АЖнинг бир гуруҳ ишчилари билан жиноий тил бириктирган. У "Олтин ва кумушни аффинажлаш цехи"нинг кийим алмаштириш хонасига қимматбаҳо металл – саноат қумларини яшириб қўйгани фош бўлган.

Ҳуқуқни муҳофаза қилувчи органлар ходимлари томонидан ушбу ячейканинг пастки қисмида “перчатка”да жойлаштирилган умумий оғирлиги 4 кг 435 гр бўлган саноат маҳсулоти – шлам процессуал тарзда расмийлаштириб олинган. Лаборатория таҳлили натижаларига кўра, ушбу саноат қумлари таркибида умумий нархи 117,5 млн сўмлик 160.5 гр қимматбаҳо металлар мавжудлиги аниқланган.

Фуқаро Х.Ф. Чирчиқ шаҳрида "Олмалиқ КМК” АЖнинг қўриқлаш хизматида бўлиб ўтаётган қабулда қатнашиш учун келган вақтида қўлга олинган. Мазкур ҳолат юзасидан Жиноят кодексининг тегишли моддалари билан жиноий иш қўзғатилган.

Аввалроқ, Самарқандда қимматбаҳо олтин бўлакларини ноқонуний равишда олиб кетаётган фуқаро ушланганлиги хабар қилинган эди.