ОТБ иштирокида тадбиркорликни ривожлантириш лойиҳаси амалга оширилади

Вазирлар Маҳкамасининг «Осиё тараққиёт банки иштирокида «Кичик ва ўрта тадбиркорлик корхоналарини ривожлантириш дастури» лойиҳасини амалга ошириш чора-тадбирлари тўғрисида»ги қарори қабул қилинди.

2021 йил 20 декабрда ОТБ ҳамда Ўзбекистон ўртасида «Кичик ва ўрта тадбиркорлик корхоналарини ривожлантириш дастури» лойиҳаси доирасида:

• 5 йиллик имтиёзли давр билан 25 йил муддатга 80 млн АҚШ доллари миқдорида;
• 3 йиллик имтиёзли давр билан 15 йил муддатга 213,58 млрд сўм миқдоридаги қарзларни Ўзбекистонга ажратиш бўйича қарз битимлари имзоланган.

Ҳужжат билан қуйидагилар тасдиқланди:

• Осиё тараққиёт банки томонидан «Кичик ва ўрта тадбиркорлик корхоналарини ривожлантириш дастури» лойиҳаси доирасида ажратиладиган қарзни қайтариш ва фоиз бўйича тўловларни амалга оширишнинг прогноз жадвали;
• Осиё тараққиёт банки томонидан «Кичик ва ўрта тадбиркорлик корхоналарини ривожлантириш дастури» лойиҳаси доирасида миллий валюта эквивалентида ажратиладиган қарзни қайтариш, фоиз ва воситачилик ҳақи бўйича тўловларни амалга оширишнинг прогноз жадвали.

Қарор билан қуйидагилар белгиланди:

• лойиҳа доирасида ОТБ маблағлари Ўзбекистон республика бюджети харажатларини молиялаштириш учун йўналтирилади;
• Молия вазирлиги лойиҳанинг амалга оширилишини мувофиқлаштириш ва мониторинг олиб бориш, шунингдек, ОТБ томонидан ажратиладиган қарзлардан мақсадли ва самарали фойдаланилиши юзасидан масъул ижро этувчи орган ҳисобланади;
• ОТБ томонидан ажратилган қарзларни қайтариш, фоиз ва воситачилик ҳақи бўйича барча тўловлар Ўзбекистон республика бюджети маблағлари ҳисобидан амалга оширилади.