Салмонеллёз касаллиги тарқалиши сабабли Белгиядаги шоколад фабрикаси фаолияти тўхтатилди 

Белгия озиқ-овқат хавфсизлиги агентлиги салмонеллёз касаллиги билан боғлиқ ҳолатлар қайд этилгани сабабли Белгиянинг Арлон шаҳридаги Kinder маҳсулотлари ишлаб чиқарувчи Ferrero шоколад фабрикаси фаолиятини вақтинчалик тўхтатиб қўйди.  

"Европада охирги бир неча ҳафта ичида салмонеллёз билан боғлиқ юздан ортиқ ҳолатлар қайд этилди", - дейилади агентлик баёнотида.  

Таъкидланишича, салмонеллёз тарқалиши ва фабрикадаги ишлаб чиқариш ўртасида бевосита боғлиқлик мавжудлиги аниқланган.  

Агентлик фабриканинг ишлаб чиқаришга рухсатномаси вақтинчалик олиб қўйилиши, ишлаб чиқарган маҳсулотлари эса дўконлардан қайтариб олинишини билдирди.  

Ferrero компанияси ишлаб чиқаришда йўл қўйилган хатолар учун истеъмолчилар ва савдо ҳамкорларидан узр сўраган.  

Компания Франция, Белгия, Буюк Британия, Германия, Швеция ва Нидерландиядаги дўконларда сотилаётган Kinder маҳсулотларини қайтариб олишини маълум қилган. 

Kun.uz Ўзбекистонда Kinder шоколадлари билан боғлиқ салмонеллёз касаллигига чалиниш ҳолатлари кузатилгани ёки йўқлигини аниқлаш учун Санитария-эпидемиологик осойишталик ва жамоат саломатлиги хизмати матбуот котиби Мафтуна Саидова билан боғланди. 

Мафтуна Саидованинг қайд этишича, Ўзбекистонда Kinder шоколадлари билан боғлиқ салмонеллёз касаллиги ҳолатлари бўйича маълумот йўқ.