Солиқ кодексига фойда солиғи бўйича ўзгартиришлар киритилади

Солиқ кодексига ўзгартириш ва қўшимчалар киритилмоқда. Бу ҳақда Қонунчилик палатаси депутати Расул Кушербаев хабар берди.

Фото: Shutterstock

Унга кўра, махсус иқтисодий зоналар иштирокчилари фойда солиғидан улар томонидан киритилган инвестициялар ҳажмига қараб:

3 миллион АҚШ долларидан 5 миллион АҚШ долларигача миқдорда - 3 йил муддатга;
5 миллион АҚШ долларидан 15 миллион АҚШ долларигача миқдорда - 5 йил муддатга;
15 миллион АҚШ доллари ва ундан юқори миқдорда инвестициялар киритилганда - 10 йил муддатга озод этилади.

Таъкидланишича, қонун лойиҳасини ишлаб чиқишга президентнинг "Махсус иқтисодий зоналар иштирокчиларини янада қўллаб-қувватлаш чора-тадбирлари тўғрисида"ги қароридаги вазифалар ва эркин иқтисодий зоналарнинг 100 дан ортиқ иштирокчилари мурожаатлари асос бўлган.

Қонун лойиҳаси депутатлар томонидан биринчи ўқишда қабул қилингани айтилади.

Бундан олдин 1 майдан норезидентларнинг Ўзбекистондаги даромади бўйича солиқ ставкаси 12 фоиз миқдорида белгиланиши хабар қилинганди.