Колумбия Россиядан импорт ўрнини босиш учун Европага энергия ташувчилар етказиб беришни кўпайтиради

Колумбия президенти Иван Дуке, унинг мамлакати ғарб давлатларини Украинада Москва бошлаган уруш туфайли Россияга қарши киритилган санкциялар оқибатида юзага келган танқисликни қоплаш учун энергия ресурслари билан таъминлашда марказий роль ўйнашга тайёрлигини айтди. Бу ҳақда у 13 апрель, чоршанба куни CNN телеканалига берган интервьюсида маълум қилди. 

Шимолий Америка ва Европа давлатлари ҳақида гапирар экан, Дуке, улар энди Россиядан энергия ресурслари таъминотига таяна олмаслигини аниқ билишларини айтди. «Колумбия бу муаммони ҳал қилишга ҳисса қўша оладими?» деган риторик саволни бериб, Колумбия президенти шундай деди: «Жавоб - ҳа». Иван Дуке Богота ишлаб чиқаришни кўпайтиришга тайёр бўлган учта соҳани санаб ўтди: анъанавий нефть ва газ, кўмир қазиб олиш ҳамда тоза водород каби қайта тикланадиган энергия манбалари. 

Дунёдаги энг йирик кўмир захираларига эга Колумбия Германияга етказиб бериш ҳажмини оширади, деди Германия канцлери Олаф Шольц билан музокара ўтказган Колумбия раҳбари. 

Шу билан бирга, Дуке АҚШ президенти Жо Байденнинг Россиянинг Украинадаги хатти-ҳаракатларини геноцид деб ҳисоблаш мумкинлиги ҳақидаги фикрига қўшилди. «Украинада содир бўлаётган воқеалар геноциддир. Ва буни тўхтатиш керак... Бу ақлдан озиш», - дея таъкидлади Дуке.