Навоийда ўтказилган сайёр қабулларда 35 нафар маҳкум шартли равишда озод қилинди

Сайёр қабулларда 347 нафар фуқаро суд-ҳуқуқ соҳасида мурожаат қилган. Қабул қилинган мурожаатларнинг 204 таси жиноят,

111 таси фуқаролик, 20 таси маъмурий ва 12 таси иқтисодий ишларга оид бўлган. Уларнинг 179 таси бўйича ҳуқуқий тушунтиришлар берилган ҳамда 141 таси жойида ҳал этилган. 27 та мурожаат бўйича аризалар Олий суд томонидан кассация тартибида ҳал қилиш учун қабул қилинган. 

Сайёр қабуллар жараёнида 35 нафар шахс жазони ўташдан муддатидан олдин озод қилинган, 30 нафар маҳкумнинг озодликдан маҳрум қилиш ёки озодликни чеклаш жазоси енгилроғига алмаштирилган. Шунингдек, тайинланган жазони умумий тартибли колонияда ўтаётган 66 нафар маҳкум манзил колониясига ўтказилган. 

Фуқаролик ишлари бўйича Учқудуқ ва Кармана туман судлари томонидан 49 нафар фуқаро фойдасига 164 млн сўмлик иш ҳақини ундириш юзасидан суд буйруғи чиқарилиб, ижрога қаратилган. Иқтисодий судлар томонидан эса 15 та иш суд мажлисларида кўрилиб, тадбиркорлар фойдасига жами 6 млрд 162 млн сўмлик даъво талаблари қаноатлантирилган.