Рим папаси Путин билан учрашув учун сўров юборгани, март ойидан бери жавоб бўлмаганини айтди

Рим католик черкови раҳбари папа Франциск Украина ва Россия ўртасидаги урушни тўхтатиш учун Москвада Россия президенти Владимир Путин билан учрашмоқчи. У бу ҳақда Corriere della Sera газетасига берган интервюсида айтди. 

Рим папаси 24 феврал куни Россиянинг Ватикандаги элчихонасига борганини эслатиб ўтди.

«Уларга «Илтимос, тўхтанг» дедим. Уруш бошланганидан 20 кун ўтгач, кардинал Паролиндан Москвага боришга тайёрлигим тўғрисида Путинга хабар қилишини сўрадим», - деди у. 

Францискнинг сўзларига кўра, у ҳали ҳам Путиндан жавоб кутмоқда.

«Бундай ваҳшийликни қандай тўхтатмаслик керак? Бундан 25 йил аввал Руандада ҳам худди шуни бошдан кечиргандик», - деди у.

Католиклар раҳбари Москвага борганидан кейингина Киевга бориши мумкинлигини айтди.

«Ҳозирча Киевга бормайман. Аввал Москвага боришим, Путин билан учрашишим керак. Лекин мен руҳонийман, қўлимдан нима келади? Қўлимдан келганини қиляпман», - деди Рим папаси.