“Фарзанд асраб олишни фақат бахтли ва тўкис оилаларгагина тавсия қила оламан” — Мурод Назаров

“Аввало, бу ишда менга Жаҳонгир аканинг (Тошкент шаҳар ҳокими Жаҳонгир Ортиқхўжаев назарда тутилмоқда – таҳр.) оиласи ўз мисолида ибрат бўлган. Уларда ҳам шундай – бир қизни асраб олиб, ўқитиб, ўстириб, чиройли қилиб узатишди.

Нигора келинойим (Ортиқхўжаевнинг турмуш ўртоғи – таҳр.) – ҳеч кимга билдирмасдан жуда кўп эҳсон қилиб юрадиган ниҳоятда яхши аёл. Менимча, Жаҳонгир аканинг “Жаҳонгир ака” бўлишида ҳам келинойимнинг хизматлари катта.

Шу аёл бир куни менга меҳрибонлик уйидаги болаларни руҳлантириш учун улар билан суҳбат қилиб келишни таклиф қилди. Болаларим билан шу суҳбатда танишганман. Улар билан алоқа ўрнатганман ва вақти-соати келиб, улар фарзандларимга айланди. Буларга Нигора келинойим сабабчи бўлган.

Шахсий ҳаётимда нима ўзгарди? Аввало хурсандчилик. Бу – куч ҳам. Ишдан чарчаб бораман, бундай пайтда асаблар учига чиққан бўлади. Уларни кўриб...

Улар билан катта стол атрофида овқатланганда, югуриб келиб, мени “адажон”, дея қучоқлаганда, ҳамма чарчоқларим чиқиб кетади.

Шу билан бирга яшаш тарзимда ҳам табиийки ўзгаришлар бўлди. Бу нима дегани? Дейлик, аввал дўстларим билан кўпроқ ўтиролишим мумкин эди. Ҳозир бундай йиғинлар кескин камайиб кетди. Ҳозир болаларга кўпроқ эътибор беришим керак. Уларга эътибор керак. Аввал чет элга чиқсак, 7-8 киши тезда чиқиб кетаверардик. Бу осонроқ эди. Ҳозир 16-17 киши бўлиб кетдик. Энди чет элга чиқишимиз камайди.

Битта нарсани олаётганимда, йўқ, бунисини олақолай, дея ўзимни қисиш, ортиқча харажатлардан тийишим кўпайди. Ухлаш камроқ бўляпти.

Яна бир мисол, авваллари аёлим билан дўконларга кирсак, 3-4 нафар болага кийим олиш осонроқ эди. Яқинда аёлим бир дўконга кириб кетди. Икки соатдан кейин қайтиб чиқди. Барака топсин, қарасам, катта сумкада 14 боламизга кийим-кечаклар олиб чиқибди.

Ўзингизга олдингизми, десам, кейинроқ олармиз, деди. Бунга ҳам тайёр туриш керак. Лекин бунда ички бахт ҳисси жуда катта”, – деди Мурод Назаров.

У шунингдек, сайт мухбирининг буни бошқаларга ҳам тавсия қиласизми, дея берган саволига “йўқ” деб жавоб берди. У бу жавобини шундай қўшимчалар билан изоҳлади:

“Тарғиб қилишга ҳам, тавсия қилишга ҳам шошмайман. Бола асраб олганимни эшитган яна ўнлаб одамлар бизга ҳам ёрдам бер, дея сўради. Лекин уларнинг баъзиларига ёрдам бердим, баъзиларига эса йўқ.

Бир нарсани айтиш керак, биздаги меҳрибонлик уйларида болаларни шароити қониқарли даражада. Аъло эмасдир лекин ёмон ҳам эмас. Болаларни қорни тўқ, эгни бут. Улар давлат ва нодавлат ташкилотлар томонидан қаровга олинган. Қолаверса, халқимиз ғамхўр, диний қадриятларимиз ҳам етимни бошини силашни буюради.

Баъзи одамлар болаларни ўз қарамоғига олади, лекин уларнинг айримларида ҳали оилавий уйғунлик, тинчлик йўқ. Улар бу билан болани баттар стрессга тушириб қўяди.

Шунинг учун, бунга аввало оила тайёр бўлиши керак. Оила шунингдек, тўла-тўкис бахтли бўлса, ота-она нафақат пули, меҳрини ҳам ўз болаларидан орттира оламан, дея ишонса, унда қилсин. Бунга тарғиб қиламан. Шошишмасин.

Мен ҳам атайлаб тўққизта фарзанд олмадим, бу – Худонинг тақдири. Эшитишимча, ҳозир меҳрибонлик уйларидан олинган болаларнинг ярмидан кўпи яна ўша ерга қайтиб боради. Бу бола учун қандай стресслигини биласизми? Биринчи стресс болани ўша жойга ташлаб кетишгани бўлса, иккинчиси – кетиб, яна қайтиб келиш. Бу унинг учун бутун умрлик жарохат дегани. Шошиш керак эмас. Шунинг учун ҳам одамларни бу ишга тарғиб қилишга шошмайман”.

Интервьюни тўлиқ ҳолда юқоридаги видео орқали томоша қилишингиз мумкин.

Илёс Сафаров суҳбатлашди.
Тасвирчи ва монтаж устаси – Абдусалим Абдувоҳидов.