Россиядан Ҳиндистонга нефт етказиб бериш 31 бараварга ошди

Қайд этилишича, Москва Деҳлига 30 фоизлик чегирма таклиф қилган, бундан ташқари, тўловларни ҳинд рупияси ва БАА дирҳамида қабул қилмоқда.

Фото: AP

Ҳиндистон 27 майдан 15 июнгача Россиядан ўтган йилнинг шу даврига нисбатан 31 баравар кўп нефт, 8 баравар кўп кўмир сотиб олди. Бу ҳақда Reuters агентлиги хабар берди.

Агентликнинг маълумотига кўра, Ҳиндистон ушбу давр мобайнида Россиядан 331,17 миллион долларлик кўмир, 2,22 миллиард долларлик нефт сотиб олган.

Агентлик манбаларининг таъкидлашича, Москва Деҳлига 30 фоизлик чегирма таклиф қилган, бундан ташқари, тўловларни рупия ва БАА дирҳамида қабул қилмоқда.

Reuters ҳисоб-китобига кўра, Ҳиндистон уч ҳафта ичида Россиядан кунига 16,55 миллион долларлик кўмир сотиб олган.

Суткалик нефт импорти эса кунига 110,86 миллион долларни ташкил этган.

Kpler компаниясининг маълумот беришича, Осиё апрел ойида илк бор нефт сотиб олиш бўйича Европани ортда қолдирган.