Сахалинда нефть қазиб олаётган компаниянинг активлари Россия мулкига айланади

Орол шельф қисмида нефть ва газ қазиб олаётган «Сахалин-2» лойиҳасининг оператори «Сахалин Энержи» компаниясининг мулки Россия Федерациясининг тасарруфига ўтади. Россия президенти Владимир Путиннинг тегишли фармони 30 июнь, пайшанба куни ҳуқуқий ахборот расмий интернет порталида эълон қилинди. 

Бошқарув учун Россия масъулияти чекланган жамияти тузилади. Россия Федерацияси ҳукумати унинг ҳаммуассиси ёки иштирокчиси бўлмайди.

Янги компаниянинг ҳаммуассиси «Газпром Сахалин холдинг» (50 фоиз плюс 1 акция) ва ташкил этилаётган корпорациянинг ўзи бўлади, қолган акциялар бошқа эгаларга уларнинг улушларига мутаносиб равишда ўтказилиши керак, дея таъкидлайди «Интерфакс» агентлиги.

«Сахалин Энержи»ни миллийлаштириш «табиий ва техноген фавқулодда вазият таҳдиди», «одамларнинг ҳаёти ва хавфсизлиги», «Россия Федерациясининг миллий манфаатлари ва хавфсизлиги» билан изоҳланади. Путиннинг фармонида таъкидланишича, таҳдид «айрим хорижий юридик ва жисмоний шахслар» томонидан мажбуриятларнинг бузилиши натижасида юзага келган. 

Компаниянинг акциядорлари Россиянинг «Газпром» газ монополисти (50 фоиз плюс 1 акция), Британия-Нидерландиянинг Shell (27,5 фоиз минус 1 акция), шунингдек, Япониянинг Mitsui (12,5 фоиз) ва Mitsubishi (10 фоиз) ширкатлари ҳисобланади. 

Россия ҳукумати «Сахалин-2» лойиҳаси доирасида хорижий компаниялар фаолиятини текширади. Нефть-газ ташаббуси доирасида Сахалин денгизи шельфидаги Пилтун-Астохское ва Лунское конлари ўзлаштирилмоқда.