Қорақалпоғистонда комиссия аъзолари 15 кунлик маъмурий жазо ўталадиган махсус қабулхонани бориб кўрди

Сенат хабарига кўра, намойиш куни махсус қабулхонага ҳам ҳужум уюштирилган, натижада дарвоза, деворлар ва бинога зарар етказилган.

Ташриф чоғида махсус қабулхонада шахсларни сақлаб туриш, овқатланиш, тиббий хизмат ҳамда маданий ҳордик чиқаришига мўлжалланган шарт-шароитлар кўздан кечирилди. Сақланаётган фуқаролар билан суҳбатлар ўтказилди.

Махсус қабулхонада шахсларни сақлаш хоналари (камералар) ва бошқа объектлар видеокузатув мосламалари билан тўлиқ жиҳозланган. Мониторингда комиссия аъзоларига кузатув тасвирлари республика бўйлаб ягона тизимга бириктирилгани ва тасвирларни ўчириб ташлаш имкони йўқлиги тушунтирилди.

Қорақалпоғистонда юз берган ҳолат ва воқеаларни ўрганиш бўйича тузилган комиссия аъзолари Қорақалпоғистондаги нодавлат нотижорат ташкилотлари вакиллари билан ҳам учрашишди.

Учрашувда “Истиқбол авлод” ННТ Нукус филиали, “Юксак салоҳият” ННТ, Болалар ва оилани қўллаб-қувватлаш ассоциацияси ҚР филиали ва бошқа ННТлар вакиллари иштирок этди.