«Ҳар бир дақиқани қадрланг, ўзингиз учун инвестиция яратинг» – президент Архитектура институти талабалари билан суҳбатлашди

Президент дастлаб тўлиқ янги бунёд этилган Архитектура ва қурилиш институти билан танишди ҳамда профессор-ўқитувчилар, талабалар билан суҳбатда бўлди.

Тадбирда иштирок этган Kun.uz мухбири хабар беришича, давлат раҳбари ёшларни билим олишдан чарчамасликка чорлаган.

“Билимга интилган инсон қийин шароитда ҳам, ҳатто шам ёруғида бўлса ҳам ўз устида ишлайди. Мен бу институтни тўлиқ қайта қуриш, барча шароитлар билан таъминлаш ҳақида топшириқ берганимда сиз каби ёшлар, қоракўз фарзандларимнинг келажагини таъминлашни мақсад қилганман. Сизларга тилагим - ҳар бир дақиқани қадрланг, билим олиш орқали ўзингизга инвестиция яратинг. Унутманг, вақт шиддат билан ўтиб кетади, кейинчалик қўлдан чиқарилган имкониятлар учун пушаймондан фойда йўқ.

Мана шу интситутнинг ўзи бир вақтлар тўртта жойда жойлашганди. Талабалар ҳам, домлалар ҳам сарсон эди. Моддий техник базаси оғир бўлган. Мана, ҳаракат қилса қилса бўлар экан-ку. Лекин бу ҳаммаси эмас. Биз архитектура-қурилиш таълими бўйича кластер устида ишлашимиз керак. Керак бўлса, мактабгача таълимдан бошлаб илмий тадқиқот марказларигача бирлашиб ишлаши керак. Токи жаҳон талабига мос бўлган етук кадрлар тайёрлансин” – деди Шавкат Мирзиёев.

Маълум учун, институт қурилиши 2020 йил 24 июнда бошланган ва жорий йилнинг 10 мартида якунланган.

Лойиҳа доирасида 4 та бино, жумладан, 2 та 5 қаватли ўқув биноси, 8 қаватли маъмурият биноси, 5 қаватли ўқув-лаборатория биноси қурилган, ободонлаштириш ва кўкаламзорлаштириш ишлари тўлиқ якунланди. Институтда 4 та факультет ва 23 та кафедра мавжуд бўлиб, 338 нафар профессор-ўқитувчилар фаолият юритади. 

Институтда 22 та кундузги, 10 та сиртқи, 6 та иккинчи мутахассислик сиртқи таълим йўналишлари ва 25 та магистратура мутахассислиги бўйича жами 6 548 нафар талаба, жумладан 30 нафар хорижий талаба таҳсил олмоқда.