Чимёнда адашиб қолган беш киши ФВВ томонидан қутқарилди

Фуқаролар хавфсизлиги таъминланган ҳолда психологик ёрдам кўрсатилиб, тоғ чўққисидан олиб тушилган.

Фото: ФВВ матбуот хизмати

Кеча, 16 август тахминан соат 13:50 фуқаро Д.Г. Тошкент вилояти Фавқулодда вазиятлар бошқармасига берган хабарига кўра, 15 август куни у Бўстонлиқ тумани Чимён тоғ тизмасига сайр қилиш мақсадида 5 нафар набираси билан борган ва йўлдан адашганини маълум қилиб, амалий ёрдам сўраган.

Хабарга асосан, зудлик билан қидирув-қутқарув ишларига Чимён отряди альпинист қутқарувчилари жалб қилинган. Қутқарувчилар томонидан аҳоли пунктидан 15 км узоқликда бўлган Мозорсой ва Тешиктош тоғлари ҳудуди бўйлаб олиб борилган қидирув-қутқарув ишлари натижасида, фуқаролар 16 август куни соат 18:20 да топилган.

Ушбу фуқаролар хавфсизлиги таъминланган ҳолда психологик ёрдам кўрсатилиб, тоғ чўққисидан олиб тушилган.

Фуқароларнинг соғлиқлар яхши, уларга ҳеч қандай тан жароҳатлари етмаган.