Зеленский россияликларнинг ЕИга киришини тақиқлашни «яхши санкциялар» деб атади

Украина президенти Володимир Зеленский Херсон областида псевдореферендумнинг олдини олиш учун РФга қарши санкциялар кўринишидаги «қаттиқ ва аниқ қадамлар» зарурлигига ишонч билдирди. Зеленскийнинг сўзларига кўра, бундай чекловчи чора «масалан, РФ барча фуқароларига ЕИ мамлакатларига киришни тақиқлаш» бўлади. Зеленскийнинг ЕИ чегараларини руслар учун ёпиб қўйиш талаби The Washington Post (WP) журналисти томонидан берилган «референдум» саволи контекстида пайдо бўлди. 16 август, сешанба кунги нашр ушбу интервьюдан парчаларнинг «таржима қилинган ва бироз таҳрирланган стенограммаси»ни чоп этди. Ушбу суҳбатнинг биринчи, қисқа парчаси газетада 8 август куни эълон қилинган. 

Зеленскийнинг сўзларига кўра, бундай қадам «яхши санкциялар», «жуда яхши ва тинч санкциялар» мисоли бўлади. «Ушбу санкцияларда мол-мулк ёки ҳаётдан маҳрум қиладиган ҳеч нарса йўқ», - дея маълум қилди у.

«Мен бошидан айтгандим, фикримча, энг муҳим санкциялар чегараларни ёпишдир, чунки улар (РФ фуқаролари) бошқаларнинг ҳудудларини тортиб оляпти», — дея таъкидлади Зеленский. «Майли, фалсафасини ўзгартирмагунча, ўз дунёсида яшашсин. Давлатлар чегараларни ёпиши ва энергия ташувчиларга эмбарго қўйиши керак. Менимча, қолган ҳамма жавоб заифроқ. Ҳозир энергия ташувчиларни етказиб беришга эмбарго тўлиқ қўйилмаган ва чегаралар ёпиқ эмас», — деди Украина раҳбари. 

Украина президенти РФ фуқароларининг фарзандлари хориждаги мактаб ва университетларда ўқишини таъкидлади. «Россияга кетишсин. Хавотирга ўрин йўқ, ўша ерга боришсин», - дея маълум қилди Зеленский. У тақиқнинг кейинроқ бекор қилиниши мумкинлигига ишора қилди. «Шунда улар тушунишади», дея қўшимча қилди у. 

Зеленскийнинг сўзларига кўра, Украинада уруш бошлангани учун жамоавий жавобгарлик зарур. «Улар (руслар) бу одамларни сайлаганлар, энди улар билан уришишмаяпти, улар билан баҳслашишмаяпти ва уларга бақиришмаяпти. Урушга ошкора қаршилик қилаётган руслар - бу алоҳида ҳолатлар, ва бу одамлар қамоқда. Шундай экан, руслар уйларига кетсин, ҳамма Россияга кетсин», деди Украина раҳбари. 

«Сиз бу изоляцияни хоҳлайсиз, шундай эмасми? Бутун дунёга у сизнинг қоидаларингиз бўйича яшаши кераклигини айтяпсиз. Хўш, унда у ерга кетинг ва ўша ерда яшанг», - деди у РФ фуқароларига. 

Украина давлати раҳбарининг таъкидлашича, бу РФ президенти Владимир Путинга таъсир қилишнинг ягона йўли. Зеленскийнинг версиясига кўра, Россия етакчисининг ҳаёти унга РФ аҳолиси томонидан таҳдид бор-йўқлигига боғлиқ. Украина президентининг фикрича, бу - жуда «тушунарли» ва «жуда оддий» санкциялар. Улар - «пул, газ ёки қувурлар, қишда иссиқликсиз қоладиган немислар ҳақида эмас». «Чегараларни бир йилга ёпинг, натижани кўрасиз», — дея хулоса қилди Зеленский. 

Аввалроқ Финландия сентябрдан бошлаб Россия фуқароларига бериладиган визалар сонини кескин қисқартириши маълум бўлган эди. Бу ҳақда мамлакат ташқи ишлар вазири Пекка Ҳаависто Yle миллий телерадиокомпанияси эфирида маълум қилди. Ҳаавистонинг сўзларига кўра, янги чоралар Финландия қонунчилигига ўзгартиришлар киритишни талаб қилмайди. Сайёҳлик визаларини кўриб чиқиш муддати ё маълум кунлар ёки кунига соатлар билан чекланади, бу уларнинг сонини сезиларли даражада камайтиради, деди вазир.

Латвия бош вазири Кришянис Каринш бошчилигидаги ҳукмрон коалиция Россия фуқароларига мамлакатда вақтинчалик яшаш учун рухсатномалар (ВЯР) фақат алоҳида ҳолатларда узайтирилишига келишиб олди, деб хабар берди Delfi.lv. Келгуси ҳафталарда ҳукуматнинг аниқ қарорлари қабул қилинади, деди Каринш. Латвия ТИВ никоҳни истисно ҳолатлар сифатида таснифлаш мумкинлигига аниқлик киритди.

Бунгача Латвия президенти Эгилс Левитс ЕИ даражасида россияликларга шенген визалари берилишини чеклаш зарурлигига ишора қилган эди. Латвия 24 февраль, Россиянинг Украинага тўлиқ босқинининг биринчи кунида русларга сайёҳлик визалари беришни тўхтатди, бироқ россиялик сайёҳлар ҳали ҳам бошқа шенген давлатларидан визалар билан келишмоқда, деди у.