Трасс ва Шолц ишончли энергия таъминоти муҳимлигини таъкидлади

Британия ҳукуматининг янги раҳбари Лиз Трасс Германия канцлери Олаф Шолц билан телефон орқали энергия инқирозини муҳокама қилди. «Иккала сиёсатчи ҳам ишончли ва барқарор энергия таъминоти муҳимлигини таъкидлади», деди Британия ҳукумати вакили 7 сентябр, чоршанба куни кечқурун. Унинг сўзларига кўра, Трасс Европада демократия ва эркинликни ҳимоя қилиш ҳамда Россиянинг иқтисодий шантажидан азият чекаётган мамлакатларга ёрдам кўрсатиш муҳимлигини таъкидлаган. Британия ҳукумати раҳбари, шунингдек, Германияни мудофаа соҳасида яқинроқ ҳамкорлик қилишга чақирди. Трасс, шунингдек, Шимолий Ирландия бўйича протоколда тез орада ечим топилишига умид билдирди. Буюк Британия ва Европа иттифоқи Брекзитдан кейин Европа иттифоқига аъзо давлат Ирландия ва Британиянинг Шимолий Ирландия провинцияси ўртасида божхона ва чегара назорати қандай ташкил этилиши кераклиги бўйича келишмовчиликда. 

Ўз навбатида, Шолц Трассни бош вазир лавозимига тайинлангани билан табриклади ва уни тез орада Берлинга расмий ташриф билан келишга таклиф қилди, деб хабар берди федерал ҳукумат вакили Штеффен Хебештрайт. 

Бир кун олдин Лиз Трасс Украина президенти Володимир Зеленский билан телефон орқали гаплашган эди. Бу унинг бош вазир этиб тайинланганидан кейин хорижий давлат раҳбари билан биринчи мулоқоти бўлди. Трассга кўра, Украинани «тўлиқ қўллаб-қувватлайди». Киев узоқ муддатли истиқболда Лондоннинг ёрдамига ишониши мумкин, деб хабар берди Британия бош вазири офиси. 

Раҳбарлар, шунингдек, «глобал хавфсизликни мустаҳкамлаш зарурати ва Путин уруш машинасини молиялаштиришни тўхтатиш учун зарур бўлган чораларни» муҳокама қилишди.