Қирғизистон парламенти шошилинч йиғилиш ўтказади

Қирғизистон миллий хавфсизлик давлат қўмитасининг хабарига кўра, эришилган келишувларга қарамасдан отишма давом этмоқда.

Фото: Anadolu Agency

Қирғизистон парламенти шошилинч йиғилиш ўтказади, деб хабар берди парламент депутати Дастан Бекешев.

Унинг сўзларига кўра, Тожикистон билан чегарадаги вазият сабабли мамлакатда ҳарбий ҳолат жорий этиш масаласи муҳокама қилиниши мумкин.

«Интимак» фракцияси депутати Марлен Маматалиевнинг билдиришича эса, ҳозирча ҳарбий ҳолат жорий этилмайди.

«Яна бир кун кутамиз, ҳар икки томон ўт очишни тўхтатиш чораларини кўраётгани ҳақида хабарлар келмоқда», — деди Маматалиев.

Қирғизистон ва Тожикистон ўртасидаги чегарада вазият охирги марта 14 сентябр куни кескинлашди, ўшанда чегарачилар чегаранинг учта участкасида отишма уюштирди. Оқибатда ҳар икки томондан бир неча киши ҳалок бўлган, ўнлаб одамлар жароҳатланган.

Аввалроқ Самарқандда Қирғизистон президенти Садир Жапаров ва Тожикистон президенти Имомали Раҳмон чегарадаги вазият юзасидан юзма-юз музокара ўтказгани хабар қилинганди.

Хабарга кўра, икки давлат раҳбарлари тегишли тузилмаларга ўт очишни тўхтатиш, қўшин ва воситаларни тўқнашув чизиғидан олиб чиқиш бўйича кўрсатмалар беришга келишиб олган.

#Қирғизистон #Тожикистон