Ўзбекистонда Литва олий ўқув юртлари филиаллари очилади

Тошкент шаҳрида Ўзбекистон ва Литва Ташқи ишлар вазирликлари ўртасидаги маслаҳатлашувлар навбатдаги давраси бўлиб ўтди.

Ўзбекистон ташқи ишлар вазири ўринбосари Ғайрат Фозилов ва Литва ташқи ишлар вазири ўринбосари Мантос Адоменас бошчилигидаги делегациялар томонларни қизиқтирган соҳалардаги икки томонлама муносабатлар бугунги ҳолати ва истиқболларини муҳокама қилди.

Томонлар Савдо-иқтисодий ҳамкорлик бўйича ҳукуматлараро комиссия фаолиятини жадаллаштириш юзасидан келишиб олди. 2023 йили Тошкент шаҳрида комиссия навбатдаги йиғилишини ҳамда унинг доирасида бизнес-форумни ўтказиш таклифи билдирилди.

Литва бозорига Ўзбекистондан турли хил маҳсулотларни, тўқимачилик ва кимё саноати товарлари, қурилиш материаллари, минерал ўғитлар, мева-сабзавот ва бошқаларни етказиб беришни ташкил этиш имкониятлари мавжудлиги қайд этилди.

Икки мамлакат савдо-саноат палаталари, шаҳарлари ва ҳудудлари ўртасидаги алоқаларни мустаҳкамлаш, ўзаро аснода транспорт ва божхона преференция ва имтиёзларини тақдим этиш, меҳнат миграцияси оқимларини диверсификациялаш, сайёҳлар алмашинувларини кўпайтириш бўйича ташаббуслар кўриб чиқилди.

Томонлар таълим, соғлиқни сақлаш соҳаларида тажриба алмашиш ва қўшма тадбирларни ташкил этиш, Ўзбекистонда Литва олий ўқув юртлари филиалларини очиш, мутахассислар, ўқитувчилар ва талабалар учун стажировкаларни ташкил этиш масалаларини ўрганишга келишиб олди.