Ногиронлиги бўлган болаларга нафақани композит тартибда тайинлаш йўлга қўйилади

Ҳукуматнинг “Ногиронлиги бўлган болаларга ва одам иммунитет танқислиги вирусини келтириб чиқарадиган касалликка (ОИВ инфекциясига) ёки ҳаёт учун хавфли ва сурункали ривожланадиган кам учрайдиган (орфан) касалликларига чалинган 18 ёшгача бўлган шахсларга нафақа тайинлашни соддалаштириш чора-тадбирлари тўғрисида”ги қарори лойиҳаси эълон қилинди.

Ногиронлиги бўлган болалар, одам иммунитет танқислиги вирусини келтириб чиқарадиган касалликка (ОИВ инфекциясига) ёки ҳаёт учун хавфли ва сурункали ривожланадиган кам учрайдиган (орфан) касалликларига чалинган 18 ёшгача бўлган шахсларга композит тартибида нафақа тайинлаш бўйича давлат хизматини кўрсатиш маъмурий регламенти тасдиқланади.

2023 йил 1 январдан бошлаб ногиронлиги бўлган болаларга ва одам иммунитет танқислиги вирусини келтириб чиқарадиган касалликка (ОИВ инфекциясига) ҳамда орфан касалликларига чалинган 18 ёшгача бўлган шахсларга нафақани композит тартибда тайинлаш йўлга қўйилади.

Бунда, ногиронлиги бўлган болаларни ҳамда одам иммунитет танқислиги вирусини келтириб чиқарадиган касалликка (ОИВ инфекциясига) ҳамда орфан касалликларига чалинган 18 ёшгача бўлган шахсларни тегишли педиатрия тиббий-ижтимоий эксперт комиссияларида тиббий кўрикдан ўтказиш жараёнида улар ногиронлиги бўлган шахс деб топилганда бир вақтнинг ўзида ногиронлик нафақаси тайинланади.

Тиббий-ижтимоий хизматларни ривожлантириш агентлиги:

• ногиронлиги бўлган болалар ҳамда одам иммунитет танқислиги вирусини келтириб чиқарадиган касалликка (ОИВ инфекциясига) ҳамда орфан касалликларига чалинган 18 ёшгача бўлган бўлган шахслар ҳақидаги маълумотларни Пенсия жамғармасига электрон шаклда тақдим этиб боришни;
• Ахборот технологиялари ва коммуникацияларини ривожлантириш вазирлиги билан биргаликда “Электрон ҳукумат” тизими идоралараро интеграция платформаси доирасида ТИЭК ахборот тизимини Пенсия жамғармаси “Пенсия” ахборот тизимига тўлиқ интеграция қилинишини таъминлайди.

Соғлиқни сақлаш вазирлиги:

• одам иммунитет танқислиги вирусини келтириб чиқарадиган касалликка (ОИВ инфекциясига) ҳамда орфан касалликларига чалинган 18 ёшгача бўлган шахслар ҳақидаги маълумотларни Пенсия жамғармасига электрон шаклда тақдим этиб боришни;
• “Республика ва ҳудудий ОИТСга қарши кураш марказлари”, “Республика ихтисослаштирилган педиатрия илмий-амалий тиббиёт маркази, Республика ихтисослаштирилган гематололгия илмий-амалий тиббиёт маркази, Республика ихтисослаштирилган дерматовенерология ва косметология илмий-амалий тиббиёт маркази, Республика “Она ва бола” скрининг маркази”лари ахборот тизимини Пенсия жамғармаси “Пенсия” ахборот тизимига интеграция қилишни таъминлайди.

Пенсия жамғармаси:

• Тиббий-ижтимоий хизматларни ривожлантириш агентлиги ҳамда Соғлиқни сақлаш вазирлиги томонидан тақдим этилган маълумотлар асосида ногиронлиги бўлган болалар ҳамда одам иммунитет танқислиги вирусини келтириб чиқарадиган касалликка (ОИВ инфекциясига) ҳамда орфан касалликларига чалинган 18 ёшгача бўлган шахсларга ногиронлик нафақаларини ушбу шахслар иштирокисиз тайинлаб боради;
• нафақа олувчи шахслар вафот этганини Адлия вазирлигининг “ФҲДЁ ягона электрон архиви” ахборот тизими билан ахборот тизимлари ўзаро интеграция асосида аниқлаб боради.