Украинада вайрон бўлган Қрим кўприги тасвирланган марка чиқарилади

Украинанинг «Укрпочта» бош почта ташкилоти вайрон бўлган Қрим кўприги тасвирланган марка чиқарилиши тўғрисида эълон қилди. Компания ўз эълонида маркани Россия президенти Владимир Путиннинг 70 ёшга тўлиши муносабати билан «совға» деб атади. 

Маркада Керч бўғози орқали ўтувчи ва вайрон бўлган кўприкнинг четида қўлларини чўзган ҳолда «Титаник» фильми қаҳрамонларига ўхшаш ҳолатда турган персонажлар тасвирланган бўлиб, унинг ўзи «Қрим кўприги – офарин!» деб номланади.

Керч бўғози орқали ўтувчи кўприкда содир бўлган портлаш натижасида уч киши ҳалок бўлган - бундай дастлабки маълумотлар Россия Тергов қўмитаси томонидан тақдим этилди. 

Маҳкама баёнотига кўра, улар воқеа жойи яқинида бўлган автомобиль йўловчиларидир. «Ҳозирда икки кишининг жасади сувдан олиб чиқилган - бир эркак ва аёл, уларнинг шахси аниқланмоқда», деб таъкидлайди ТҚ. 

Терговчилар, шунингдек, фурани портлатилган юк билан олиб ўтган юк машинаси эгасини аниқлади - у Краснодар ўлкасида яшовчи шахс. ТҚ юк машинасининг маршрути ва транспорт ҳужжатларини ўрганмоқда. 

Россия 2014 йил Украинанинг Қрим яриморолини эгаллаб олгач, ҳудудни Россиянинг қуруқликдаги қисми билан боғлаш учун Керч кўпригини қурган эди. Украина уруш бошланганидан буён Қрим кўпригига зарба беришга ҳақли эканини айтиб келади.