Рақамли технологиялар ва чет тилини ўқитишга ихтисослаштирилган ўқув маркази ташкил этилади

“Рақамли технологиялар ва чет тилларини ўқитишга ихтисослаштирилган ўқув марказини ташкил этиш чора-тадбирлари тўғрисида”ги ҳукумат қарори лойиҳаси эълон қилинди.

Қашқадарё вилояти ҳокимлиги, Халқ таълими вазирлиги, Божхона қўмитаси, Вазирлар Маҳкамаси ҳузуридаги Хорижий тилларни ўрганишни оммалаштириш агентлигининг:

Китоб туманидаги “Баркамол авлод” болалар мактаби ҳузурида давлат мактабдан ташқари таълим муассасаси шаклида юридик шахс мақомига эга бўлмаган Рақамли технологиялар ва чет тилларини ўқитишга ихтисослаштирилган ўқув марказини ташкил этиш;

Қашқадарё вилояти, Китоб тумани, Пахтакор кўчаси, 1-А-уй манзилида жойлашган меҳрибонлик уйи биноси мактабга оператив бошқарув ҳуқуқи асосида ўтказиб бериш тўғрисидаги таклифи маъқулланади.

Қуйидагилар марказ асосий вазифалари этиб белгиланади:

• ёшлар ва вояга етмаганлар учун миллий контентларни ривожлантириш, ижтимоий тармоқлардан фойдаланиш маданиятини ошириш;
• интернет жаҳон ахборот тармоғининг UZ доменида фойдали маърифий ва мавзули веб-ресурсларни яратиш;
• миллий ижтимоий тармоқ ва мессенжерлар ҳамда ахборот коммуникацион дастурлар яратиш борасида илғор хорижий мамлакатлар тажрибасини ўргатиш ва улар ижобий жиҳатларини миллий амалиётга жорий этиш;
• хорижий тиллар бўйича филологлар, таржимонлар ва гид ҳамроҳларини тайёрлаш;
• хорижий тилларни пухта ўзлаштириш, тил асосий кўникмаларини шакллантириш учун видеоролик, ўйин, кўнгилочар кўрсатув, фильмлар ва бошқа ўргатувчи контентлар орқали ёшларга ўргатиш;
• ўсиб келаётган ёш авлод ўртасида хорижий тилларни ўрганишни оммалаштириш, тил билиш имкониятларини тарғиб қилиш орқали хорижий тилларни ўрганишга қизиқиш уйғотиш;
• ўқувчи-ёшларда мустақил қарор қабул қилиш кўникмаларини, ватанпарварлик, миллий ва умуминсоний қадриятларни шакллантириш, ахборот маконидаги турли таҳдидларга нисбатан соғлом иммунитетни ҳосил қилиш.