Кореядан Тошкент ва Самарқандга янги авиапарвозлар йўлга қўйилиши кутиляпти

Сеул шаҳрида бўлган Ўзбекистон ташқи ишлар вазири Владимир Норов T'way Air авиакомпанияси катта вице-президенти Ким Хюнг Йи билан учрашди.

Фото: Dunyo

Мулоқотда икки давлат фуқароларининг ўзаро сайёҳлик ва хизмат сафарларига ортиб бораётган талабини қондириш мақсадида Ўзбекистон ва Корея ўртасида авиақатновларни ошириш имкониятлари муҳокама қилинди.

Корея томонига Ўзбекистонда туризм соҳаси миллий иқтисодиёт стратегик тармоқларидан бири сифатида қаралиши айтиб ўтилди. Таъкидланганидек, мамлакатда қисқа вақт ичида хорижлик сайёҳлар келиши ва сайёҳлик инфратузилмаси объектлари сони сезиларли даражада ошди.

Икки давлат ўртасидаги ижтимоий-иқтисодий ва маданий-гуманитар соҳалардаги муносабатларни янада ривожлантиришга хизмат қилиши мумкин бўлган Тошкент ва Самарқанд шаҳарларига T'way Air авиакомпанияси парвозларини йўлга қўйиш масаласини ўрганиш бўйича келишувга эришилди.