Россияда урушдан бош тортганларга дезертирлик учун суд билан таҳдид қилинмоқда

Gulagu.net лойиҳаси мисол тариқасида Богучари шаҳридаги 91711-сонли ҳарбий қисмнинг 252-мотоўқчилар полкига сафарбар қилинган фуқароларнинг видеомурожаатини келтирди — улардан 39 нафари босиб олинган ҳудудлардаги жанговар ҳаракатларда қатнашишдан бош тортган. 

Улар Россия чегарасигача пиёда борганликларини ва у ерда ҳарбийлардан уларни қисмга қайтаришларини сўрашганини айтишди. 

Бироқ бунинг ўрнига урушдан бош тортганлар автобусга миндирилиб, Луҳанск вилоятининг босиб олинган ҳудудига қайтарилган.

Шу билан бирга, ASTRA нашри Томск вилоятидан сафарбар қилинганлар ҳақида маълумот берди. Улар, қариндошларининг сўзларига кўра, икки ҳафтадан кўпроқ вақт олдин фронтни тарк этган ва кейин Луҳанск вилояти ўрмонларида яширинган. 

Улар охирги марта 17 октябр куни алоқага чиқишган. Урушдан бош тортганлар Томск вилоятидан Давлат думаси депутати Татяна Соломатинадан ёрдам сўрашган, аммо у гўёки «офицерлар дезертирлар билан ишлашдан бош тортишини» айтган.

Бундан олдин Украина президенти Володимир Зеленский ўз ихтиёри билан таслим бўлишга қарор қилган россиялик аскарларга Украина ҳарбийлари маданият билан ва халқаро конвенцияларга риоя қилган ҳолда муносабатда бўлишини ваъда қилганди. 

«Ҳозир барчангиз учун муҳим палла: ҳаётингизни ҳал қилиш вақти келди. Бегона ерда ҳарбий жиноятчи сифатида ҳалок бўлгандан кўра, яхшиси чақирув қоғозини олманг. Майиб-мажруҳ бўлиб, кейин тажовузкорлик уруши қатнашчиси сифатида судда жавоб бергандан кўра, жиноий сафарбарликдан қочинг. Бизнинг қуролларимиз зарбасидан ҳалок бўлгандан кўра, яхшиси украинларга асир тушинг», деган Украина президенти.

Зеленский Россия ҳукумати асирга тушиш тафсилотларидан хабар топмаслигига - яъни Россия расмийлари кимдир ихтиёрий таслим бўлганини била олмаслигига ҳамда бирорта россиялик ўз ихтиёрига қарши Москвага қайтарилмаслигига ваъда қилган.