ОАВ Испанияда Путин маъмурияти раҳбари ўринбосарининг оиласига тегишли ер участкалари ва виллани аниқлади

Россия президенти маъмурияти раҳбарининг биринчи ўринбосари Сергей Кириенконинг оиласи ишончли вакили орқали Испанияда иккита ер участкаси ва вилласига эгалик қилади. Бу ҳақда 9 ноябрь, чоршанба куни «Важные истории» нашри хабар берди. Унинг маълумотига кўра, умумий майдони 2,4 гектар бўлган ўрмон участкалари Кириенколар оиласининг ишончли вакили Роберт Гндоляннинг Bell-67 испан компаниясига тегишли. Худди шу компания Каталониядаги Коста-Бравада виллага эгалик қилади, у ҳақда "Собеседник" нашри 2020 йилда Сергей Кириенконинг қариндошлари учун дам олиш маскани сифатида ёзган.

«Важные истории» таъкидлашича, Роберт Гндолян Кириенконинг ўғли - Владимирнинг синфдоши. Журналистларнинг қайд этишича, кичик Кириенко "Ростелеком" вице-президенти лавозимини эгаллаганидан сўнг Гндолян компания шуъба корхоналаридан бирининг директори бўлган. Шунингдек, у катта Кириенко томонидан асос солинган Саровбизнесбанкдаги Владимир Кириенконинг улушини олган.

Сергей Кириенко президент маъмуриятининг ички сиёсати учун масъулдир, уни «Донбасс куратори» деб аташади, дея ёзмоқда "Важные истории". 2022 йил мартида Кириенко Россиянинг Украинага кенг кўламли ҳарбий бостириб кириши муносабати билан АҚШ санкциялари остида қолган. Канада, Австралия, Япония, Янги Зеландия ва Украина ҳам амалдорга нисбатан чеклов чораларини киритди. ЕИ ва Буюк Британия аввалроқ Сергей Кириенкони Алексей Навалнийнинг заҳарланиши билан боғлиқ ҳодиса юзасидан қора рўйхатга киритган эди. Россия президенти маъмурияти раҳбари биринчи ўринбосарининг ўғли 2022 йил февралидан бери АҚШ санкциялари остида.

2020 йилда «Проект» журналистик суриштирувлар портали Сергей Кириенконинг Рублёвкадаги уйи ҳақида ёзганди. Журналистлар ушбу объект «Ландшафт» коттеж посёлкасидаги қарийб 7000 квадрат метр майдонда қурилганини аниқлади. Ушбу ҳудудда асосий бинодан ташқари, спорт мажмуаси ва хавфсизлик ходимлари учун уй жойлашган.