Австралия Россиядан MH17 иши бўйича судланганларни топширишни талаб қилди

Австралия Россиядан 2014 йил июлида Донбасс осмонида ракета билан уриб туширилган Малайзия авиакомпаниясининг Boeing 777 йўловчи самолёти ҳалокатида айбдор деб топилган уч кишини топширишни талаб қилди. Ҳаага округ судининг MH17 иши бўйича ҳукми Россия ушбу ҳодиса учун жавобгар эканлигини тасдиқлайди, деди 18 ноябрь, жума куни Австралия ташқи ишлар вазири Пенни Вонг журналистларга. «Биз Россияни жирканч жиноятлари учун судга тортилиши мақсадида судланганларни топширишга чақирамиз, - деди Вонг. - Россия томонидан ҳеч қандай бўйин товлаш, ёлғон гапириш ёки нотўғри маълумотлар бу ҳақиқатдан қочишга ёрдам бермайди».

Австралия Ташқи ишлар вазирлиги раҳбарининг сўзларига кўра, Россиянинг бу одамларни топширишдан бош тортиши Россия президенти Владимир Путинга нисбатан қаттиқ айблов бўлди. «Биз Россияга айтмоқчимиз: сиз қотилларга бошпана бераётганингизни бутун дунё билади ва одамлар сиз ҳақингизда гапирмоқда, жаноб Путин», деди Пенни Вонг Австралиянинг ABC телеканалига берган интервьюсида. 

Бир кун аввал Ҳаага округ суди ўзини «ДХР» деб эълон қилган ҳудуд собиқ «мудофаа вазири» Игор Гиркин (Стрелков), генерал-майор Сергей Дубинский ва Леонид Харченкони 2014 йил 17 июлда содир бўлган Малайзия авиакомпаниясига тегишли Boeing 777 самолёти ҳалокатида айбдор деб топди. Учаласи ҳам сиртдан умрбод қамоқ жазосига ҳукм қилинган. 

Суд томонидан кўриб чиқилган тергов хулосаларига кўра, судланувчилар жиноят қуроли - «Бук» зенит-ракета мажмуасининг (ЗРМ) Россиядан келишига ҳисса қўшган ва унинг ҳаракатларини мувофиқлаштирган, шу орқали «298 кишининг ўлимида асосий рол ўйнаган». Шунингдек, суд МН17 рейси Первомайский қишлоғи яқинидаги даладан отилган Россиянинг «Бук» ракетаси билан уриб туширилганини исботлаган. 

Гиркин, Дубинский ва Харченко қурбонларнинг яқинларига жами 16 миллион евро тўлашга мажбур бўлади. Агар улар ҳукм кучга киргандан кейин саккиз ой ичида буни қилмаса, товон Нидерландия давлати томонидан тўланади, у эса маҳкумлардан пул талаб қилади. 

Россия Ҳаага судининг MH17 иши бўйича чиқарган ҳукмини рад этиб, уни сиёсий мотивларга эга, деб атади. «Процесснинг бориши ва натижалари шуни кўрсатадики, у Россиянинг фожиага алоқадорлиги ҳақидаги Ҳаага ва унинг шериклари, қўшма тергов гуруҳи томонидан илгари сурилган версияни кучайтиришга қаратилган сиёсий буюртмага асосланган», — деди Россия ТИВ 17 ноябрда. 

Судланган россияликлар Россияда. Улар Нидерландияга берилмайди, деб хабар қилди «Интерфакс» ахборот агентлиги ҳуқуқ-тартибот органларидаги манбага таяниб. «Россия Конституциясида Россия фуқароларини хорижий давлатларга экстрадиция қилиш тўғридан тўғри тақиқланган. Шу сабабли на бир, на иккинчи маҳкум экстрадиция қилинмайди», - деди агентлик суҳбатдоши.