Европа 2022 йилда Россиядан суюлтирилган табиий газ импортини 40 фоизга оширди

2022 йил бошидан буён Россия суюлтирилган табиий газининг (СТГ) Европага импорти ўтган йилнинг шу даврига нисбатан 42 фоизга ошди. Бу ҳақда 29 ноябрь, душанба куни Financial Times ўз ҳисоб-китобларига таяниб хабар берди.

Россиядан СТГ 2022 йилда ушбу ёнилғининг Европа денгиз импортининг 16 фоизини ташкил қилади. Деярли бутун ҳажм Франция, Бельгия, Испания ва Нидерландияга етказилди, деб ёзади FT. 

Умуман олганда, Россия Европага 17,8 миллиард куб метр СТГ экспорт қилди ва минтақадаги иккинчи йирик етказиб берувчига айланди. Биринчи ўринни 42 фоизлик улуш билан АҚШ, учинчи ўринни 13,7 фоиз билан Қатар эгаллаган. 

17,8 млрд кубометрлик умумий ҳажм газ қувурлари орқали етказиб берилган 62,1 млрд. кубометр газнинг бир қисмини ташкил этса-да, бу Европани Кремлнинг «қуроли» олдида «ҳимоясиз қолдиради», дея огоҳлантирган FT. 

Россия газ қувурлари орқали етказиб беришни кескин қисқартирганидан сўнг, Европа давлатлари тушиб кетган ҳажмларни қоплаш учун СТГ бозорига киришди. Refinitiv таҳлилчиларига кўра, йил бошидан бери Европа рекорд даражадаги - 111 миллиард кубометр СТГ импорт қилди, бу ўтган йилга нисбатан қарийб 70 фоизга кўпдир. 

«Путин бир кун уйғониб: «Биз Европага СТГ етказиб беришни тўхтатамиз», дейиши мумкин, бу эса минтақани янада қимматроқ бозорда газ харид қилишга мажбур қилади», - дея огоҳлантиради Колумбия университетининг энергия сиёсати бўйича тадқиқотчиси Анн-Софи Корбо. «Россия назарий жиҳатдан газ танкерларини Бангладеш ва Покистон каби камбағал давлатларга «сиёсий манфаатга эришиш» ва «европаликларга босим ўтказиш» учун йўналтириши мумкин», деди у.