АҚШ Россия ҳарбий-саноат комплекси билан боғлиқ бўлган ўнта компанияга қарши санкция киритди

АҚШ Молия вазирлиги (Ғазначилик департаменти) сайтида маълум қилинишича, санкциялар рўйхатига мудофаа корхоналари учун асбоб-ускуналар яратиш билан шуғулланувчи юридик шахслар киритилган. 

Улар орасида, хусусан, И.В.Горинин номидаги «Прометей» конструкция материаллари марказий илмий-тадқиқот институти ва «Курчатов институти» миллий тадқиқот маркази бор.

Бундан олдин жорий йил натижаларига кўра, Россия космик саноатининг йўқотишлари 50 млрд рублдан ошиши мумкинлиги хабар қилинганди. 

«Бугунги кунда Роскосмосдаги молиявий-иқтисодий вазият шуни кўрсатадики, юмшоқ қилиб айтганда, бу ерда ҳаммаси жойида эмас. 2021 йилда давлат корпорациясининг зарари 31 миллиардни ташкил этди», - деди Роскосмос давлат корпорацияси раҳбари Юрий Борисов «Ведомости» нашрига интервьюда.

«24 февралдан кейин юзага келган вазиятни - бир қатор халқаро шартномалар, жумладан, двигателларни етказиб бериш, ишга тушириш хизматларини рад этишни ҳисобга олсак, ҳаммаси ёмонлашди. 2022 йил охиригача режалаштирилган йўқотишлар 50 миллиард рублдан ошади», - деди Борисов. 

Унинг сўзларига кўра, йўқотишларнинг асосий манбаси «корхоналар ишини нотўғри ташкил этиш билан» боғлиқ.