Ўзбекистон ва Туркия фойдали қазилмаларни тадқиқ этишда янги лойиҳаларни амалга оширади

Инвестициялар ва ташқи савдо вазирлигида Туркия Фойдали қазилмаларни тадқиқ этиш ва қидириш Директорати (МТА) бош директори ўринбосари Наил Йилдирим ва лойиҳа раҳбари Мустафо Токўглу билан учрашув бўлиб ўтди.

Иллюстратив фото

Бўлиб ўтган учрашувда МТА вакиллари Ўзбекистонда хорижий инвесторларнинг қулай фаолият юритиши учун яратилган шарт-шароитларни юқори баҳолашар экан, янги қўшма лойиҳаларни амалга оширишда фаол иштирок этишга тайёр эканликларини билдирдилар.

Фойдали қазилмаларни қидириш соҳасида янги лойиҳаларни амалга оширишни назарда тутган ҳолда сармоявий муносабатларни ривожлантириш истиқболлари муҳокама қилинди. Икки мамлакат мутахассисларининг ҳамкорликдаги фаолиятини кенгайтириш, тажриба ва технологиялар алмашиш, малакасини ошириш имкониятлари ҳам мавжудлиги таъкидланди.

Учрашув якунида томонлар ўзаро муносабатларнинг муҳокама қилинган йўналишларида ҳамкорликни ривожлантириш чора-тадбирларини келишиб олдилар.