Россияда икки аёлни ўлдирган шахс Ўзбекистонга қочгани айтилди 

Хориж давлати фуқаросига икки шахсни ғаразли мақсадда ўлдирганлик ва босқинчилик қилгани бўйича сиртдан айбловлар эълон қилинди. Шунингдек, у сиртдан қамоққа олинди, деб хабар берди Россиянинг Тергов қўмитасига таяниб «Коммерсантъ». 

Тергов маълумотларига кўра, исми шарифи келтирилмаган айбланувчи 74 ёшли аёл ва унинг 47 ёшли қизини ўлдирган. Уларнинг жасадлари ўтган йилнинг 26 декабрида Красноярск вилоятининг Волжский қишлоғидаги хусусий турар жой биносида топилган эди.

Ҳуқуқ-тартибот идоралари томонидан аниқланишича, гумондор 25-26 декабр кунлари ноқонуний равишда турар жой биносига кириб, аёлларнинг боши ва танасига пичоқ санчган. Оқибатда улар воқеа жойида вафот этган. Шундан сўнг жиноятчи деб тахмин қилинган шахс уйдан 300 минг рубл ўғирлаб, воқеа жойидан қочиб кетган. 

Кейинчалик у Россия ҳудудини тарк этган. Ҳозирда у қидирувга берилган. 

Россия Давлат Думаси депутати Александр Хинштейн маълумотларига кўра, гумондор 34 ёшда бўлиб, жиноятга қадар марҳумларнинг уйида таъмирлаш ишларини бажарган. Ҳозирги вақтда у Ўзбекистонда, деб ҳисобламоқда депутат. 

«Бу ғайриинсонни Россияга экстрадиция қилинишига эришаман», деб ёзди у ўз телеграм каналида.