Украинада Алексей Арестович истеъфога чиқарилди 

Украина президенти девони (УПД) штатдан ташқари маслаҳатчи Алексей Арестовични ўз аризасига кўра истеъфога чиқарди. Бу ҳақда Украина президенти матбуот котиби Сергей Никифоров маълум қилди. 

17 январ куни Арестович ўзининг Телеграм-каналида истеъфога чиқишини эълон қилиб, «маданиятли хулқ-атвор намунасини кўрсатмоқчи» эканини таъкидлади. «Жиддий хато, демак, истеъфо», деб ёзди у ва истеъфо сўраб ёзган аризасини илова қилди. 

14 январ куни Днипродаги кўплаб қурбонларга олиб келган кўп қаватли турар жой биносига ракета ҳужумидан сўнг Арестович ҳуқуқшунос Марк Фейгин билан суҳбатда X-22 ракетаси Украина ҳаво мудофааси кучлари томонидан уриб туширилганини, шундан сўнг унинг бўлаклари бино устига қулаганини айтди. 

Украина Ҳарбий-ҳаво кучлари унинг сўзларини рад этиб, Украина қуролли кучларида X-22 ракетасини уриб тушириш учун ҳали имконият йўқлигини маълум қилди. 

Арестовичнинг баёноти Украинада салбий реакцияга сабаб бўлди. Олий Рада депутатлари уни ишдан бўшатиш талаби билан имзо тўплашни бошлади. Днипро мэри Украина хавфсизлик хизматидан Арестовични текширишни сўради ва уни «оғзи ахлатга тўла» ва «худбин мол» деб атади. Кейинроқ Арестович хато қилганини тан олиб, кечирим сўради. 

Алексей Арестович 1975 йилда Грузияда туғилган, кейин унинг оиласи Украинага кўчиб ўтган. 1990-йилларда у актёр бўлган, реклама роликларида, фильмларда, телесериалларда ўйнаган. 1994 йилдан 2005 йилгача Разведка Бош бошқармасида хизмат қилган. 

Сиёсий карьерасини 2005 йилда «Братство» партиясида бошлайди. Ўша пайтда Украинадаги «жигарранг» инқилобга қарши чиққан эди. 2009 йилда Одесса шаҳар кенгашининг Приморский тумани маъмурияти бошлиғи ўринбосари бўлади. 2018 йилда у Краматорскдаги 872-механизациялашган бригадада разведкачи бўлиб хизмат қилган ва душман ҳудудига 33 та жанговар чиқиш қилганини айтади. 

2020 йилда Арестович УПД раҳбари Андрей Ермакнинг миллий хавфсизлик ва мудофаа соҳасидаги стратегик коммуникациялар бўйича штатдан ташқари маслаҳатчиси этиб тайинланди. 2022 йил бошида Арестович сиёсатни тарк этиш истагини эълон қилди, аммо Россия босқини бошланиши билан амалда ҳокимиятнинг расмий спикери бўлди. 

У украиналикларни ваҳима қилмасликка чақирган видеолари билан ёдда қолганди. Вақт ўтиши билан УПД маслаҳатчисининг баёнотлари ижтимоий тармоқларда танқид қилина бошлади. Х-22 ракетаси эълон қилинишидан бир неча кун олдин Арестович «етарли жиҳозланган пиёдалар таянч пункти» «Вагнер» бригадасини бир йил ушлаб туриши мумкинлиги» ҳақида гапирди. Бу Украина ҳарбийлари ғазабига сабаб бўлди. Маслаҳатчи фронтдаги хабарлар ҳақида аниқ маълумотларга эга бўлмасдан, очиқ манбалардаги ахборотни ижодий тафаккур қилишда айбланди.